प्रधानमन्त्री पुष्पकमल दाहाल ‘प्रचण्ड’ले युवाहरूलाई आफ्नो सिर्जना र क्षमता देशको पक्षमा प्रयोग गर्न आग्रह गरेका छन्।
अन्तर्राष्ट्रिय युवा दिवसका अवसरमा शनिबार भरतपुरमा आयोजित कार्यक्रममा प्रधानमन्त्री प्रचण्डले स्वदेश र विदेशमा रहेका युवा शक्तिलाई देश निर्माणमा जुट्न आग्रह गरेका हुन्।
नेपाली युवाभित्र अन्तरनीहित सिर्जनात्मक क्षमता र प्रतिभालाई देशको आर्थिक विकास र समृद्धिका निम्ति कसरी सदुपयोग गर्ने भन्नेमा आफ्नो ध्यान गएको उनले बताए।
उनले आउने दिनमा नेपालले कोल्टे फेर्दै जाने र विकासले गति लिने विश्वास व्यक्त गरे। त्यसका लागि भ्रष्टाचार र बेथितिको अन्त्य हुनुपर्ने उनको भनाइ छ।
‘हर हालतमा बेथिति र भ्रष्टाचारको अन्त्य हुनैपर्छ, तल परेको समुदायलाई माथि ल्याउने कार्यक्रम ल्याउनुपर्छ,’ उनले भने।
उनले विदेश जाने श्रमिक युवाको हकहितका लागि के गर्न सकिन्छ भन्नेबारे आफू लगातार लागिरहेको पनि बताए।
‘युवाहरूलाई रोजगार दिन ठूला विकासका परियोजना कसरी देशभित्र विकास गर्ने भन्नेतर्फ सरकारको ध्यान केन्द्रित छ,’ उनले भने।
