प्रधानमन्त्री पुष्पकमल दाहाल ‘प्रचण्ड’ले संघीय मामिला तथा सामान्य प्रशासन मन्त्री अमनलाल मोदीलाई सरकारबाट फिर्ता बोलाउने तयारी गरेका छन्।
मोदीलाई फिर्ता बोलाएर उनको ठाउँमा जनमत पार्टीकी अनितादेवी साहलाई मन्त्री बनाउने तयारी प्रधानमन्त्री प्रचण्डको छ।
प्रधानमन्त्री प्रचण्डले जनमत पार्टीकी अनितादेवीलाई आइतबार नै शपथ गराउने तयारी गरेको उनीनिकट स्रोतले बताएको छ।
मन्त्री मोदीलाई फिर्ता बोलाउने तयारीमा आफू रहेको जानकारी प्रधानमन्त्री प्रचण्डले आफ्नो पार्टीका शीर्ष नेताहरूलाई पनि दिएका छन्।
स्रोतका अनुसार शपथका लागि राष्ट्रपति कार्यालयमा समेत अनौपचारिक खबर पठाइएको छ।
अविरल वर्षाका कारण प्रधानमन्त्री प्रचण्ड आज चितवनबाट काठमाडौं फर्किने कार्यक्रम ढिला भएको छ। बिहान साढे ७ बजे काठमाडौं फर्किने योजना भए पनि प्रधानमन्त्री प्रचण्ड दिउँसो १ बजेपछि मात्र काठमाडौंका लागि उडेका छन्।
जनमत पार्टीका एक नेताका अनुसार प्रधानमन्त्री प्रचण्डले आइतबार नै अनितादेवीलाई शपथ गराउने अनौपचारिक जानकारी गराएका थिए।
‘पानी परेका कारण प्रधानमन्त्री काठमाडौ आइपुग्नुभएको छैन। उहाँ आएपछि पार्टीमा छलफल गर्छु भन्नुभएको छ,’ ती नेताले भने,‘मन्त्रालयको औपचारिक टुंगो लगाउन बाँकी नै छ। मन्त्रीहरूको जिम्मेवारी हेरफेर हुन पनि सक्छ।’
