गण्डकी प्रदेश सरकारले बाढीले क्षतिग्रस्त मुस्ताङमा राहत र उद्धार सामग्री पठाउने भएको छ।
सोमबार बसेको प्रदेश विपद् व्यवस्थापन कार्यकारी समितिको बैठकले कागवेनीमा राहत र उद्धार कार्यका लागि मेशीनरी तथा सवारी साधन समेत उपयोग गर्नुपर्ने भएकाले तीन हजार लिटर डिजेल तत्काल पठाइहाल्ने निर्णय गरेको।
मुस्ताङमा इन्धनको अभाव भएकाले उद्धारमा समस्या नहोस् भन्नका लागि प्रदेश सरकारले तत्काल इन्धनको व्यवस्था गर्ने निर्णय गरेको मुख्यमन्त्रीका प्रेस संयोजक नरहरी सापकोटाले जानकारी दिए।
उनका अनुसार तीन हजार लिटर डिजेल जिल्ला विपद् व्यवस्थापन समिति, म्याग्दीको समन्वयमा तत्कालको लागि म्याग्दीको वेनीबाट ३००० (तीन हजार) लिटर डिजेल जिल्ला विपद् व्यवस्थापन समितिलाई पठाउनेछ।
ईन्धन र सो को आपूर्ति व्यवस्थापन वापतको आवश्यक रकम भुक्तानीको लागि प्रदेश विपद् व्यवस्थापन कोषबाट जिल्ला विपद् व्यवस्थापन कोष, म्याग्दीलाई उपलब्ध गराउने निर्णय भएको उनले बताए।
त्यस्तै टेण्ट, त्रिपाल र ब्ल्याङ्केट उपलब्ध गराउने सम्बन्धमा पनि प्रदेश सरकारले आवश्यक सहजीकरण गर्ने निर्णय गरेको छ।
यसका लागि जिल्ला विपद् व्यवस्थापन समिति, मुस्ताङबाट माग भई आएमा मुख्यमन्त्री तथा मन्त्रिपरिषदको कार्यालयबाट प्रदेश गोदामघरमा रहेका टेण्ट तथा त्रिपालहरु र आवश्यकता अनुसार ब्ल्याङ्केट खरिद गरी मुस्ताङ पठाइने सापकोटाले बताए।
बैठकले बाढी प्रभावित क्षेत्रमा हुनसक्ने खानेपानी आपूर्ति, स्वास्थ्य सेवा, खाद्यान्न आपूर्ति, यातायात व्यवस्थापन, कृषि र पशुजन्य क्षति व्यवस्थापन, भूसंरक्षण लगायतका कार्यहरुमा प्रदेश सरकारका सम्बन्धित मन्त्रालयहरुबाट आवश्यक समन्वय, श्रोत साधनको परिचालन र सहजीकरण गर्ने निर्णय गरेको छ।
प्रदेश सरकारले बाढी पहिरो प्रभावित क्षेत्रमा सुरक्षा निकायहरुबाट आपसी समन्वयमा उद्दार तथा राहत सम्बन्धीकार्यहरु भईरहेकोमा थप जोखिम न्यूनीकरण तथा व्यवस्थापनमा परिचालित हुन निर्देशन समेत दिएको छ।
कागखोलामा गएरातिदेखि आएको बाढीले दुई दर्जनभन्दा बढी घर पूर्ण रूपमा क्षतिग्रस्त भएका छन्।