नेकपा (एमाले)का अध्यक्ष केपी शर्मा ओलीले दक्षिणपन्थी सरकार बनाउन एकीकृत समाजवादीका अध्यक्ष माधवकुमार नेपाल निकै तलसम्म गिरेको बताए।
मंगलबार काठमाडौंको जोरपाटीमा बागमती प्रदेशस्तरीय कार्यकर्ता प्रशिक्षणमा बोल्दै उनले नेपालले आफ्नो नेतृत्वको सरकार गिराएको आरोप लगाएका हुन्।
‘विचरा माधव नेपाल नाम त नलिए हुने हो। यो आन्दोलन समाप्त पार्नका निम्ति यति तल गिरे। अदालत गए। कहाँ गएनन्? के गरेनन्? प्रतिक्रियावादी, दक्षिणपन्थी सरकार बनाए। दुई तिहाइ कम्युनिस्ट पार्टीको सरकार ढालेर,’ उनले भने, ‘यो पार्टीमा बस्दाबस्दै, यसको वरिष्ठ नेता हुँदाहुँदै, पछाडिको सिटमा बसेर, पछाडिको ढोकाबाट घोसेमुन्टो लगाएर लुसुक्क गएर हाम्रो सरकार गिराउन पुगे। दक्षिणपन्थी सरकार बनाउन कहाँसम्म गिरेका?’
उनले प्रधानमन्त्री पुष्पकमल दाहाल ‘प्रचण्ड’, एकीकृत समाजवादीका अध्यक्ष माधवकुमार नेपालको नाम नलिई दक्षिणपन्थीको झोले भएको आरोप लगाए।
‘एउटा शब्द छ झोले। उनीहरूले हामीलाई झोले भन्छन्। वामपन्थीको झोला बोकेर दक्षिणपन्थीको झोला बोकेर कुदेको छ तिनलाई भन्छ झोले, देख्दाका वामपन्थी, नामका वामपन्थी, साइनबोर्डका वामपन्थी, स्वार्थको झोला बोकेका छन् दक्षिणपन्थीको, शब्द अलि नराम्रो लाग्छ, नाम नलिई मिलाएर बुझ्नुहोला,’ उनले प्रशिक्षणमा कार्यक्रममा भने।