नेकपा एमालेले कार्यक्रमहरूमा भद्दा आसन ग्रहण नगराउन मातहतका कमिटीलाई 'सर्कुलर' गरेको छ।
कार्यक्रम, सभा-सम्मेलनमा सहभागीभन्दा अतिथिको सूची लामो हुन थालेपछि आसन ग्रहण भनेर मञ्चमा बोलाउने परिपाटी नै अन्त्य गर्न लागेको उपमहासचिव प्रदीप ज्ञवालीले जानकारी दिए।
'सहभागीलाई तल र अतिथिलाई मञ्च बनाएर माथि राख्ने चलन अन्त्य गर्न लागेका हौं,' उनले सेतोपाटीसँग भने, 'सोमबार बसेको सचिवालय बैठकमा हामीले यसबारे छलफल गरेका छौं। अब मञ्चको ढाँचा बदलिने छ। कार्यक्रममा अतिथि पनि सहभागीसँगै बस्नु हुनेछ। सम्बोधनका क्रममा मात्रै मञ्चमा या अग्रभागमा जानु हुनेछ।'
कार्यक्रममा अतिथिलाई फूलमाला, खादाले स्वागत गर्ने परिपाटी पनि निरूत्साहित गर्न लागेको उनले जानकारी दिए।
'अब हामी पार्टीका कार्यक्रमा, सभा-सम्मेलनमा फूलमाला, ब्याज, खादा आदिको प्रयोग सकेसम्म कम गर्नेछौं,' उनले भने।
यसबारे पार्टी अध्यक्ष केपी ओलीले आफ्नो सामाजिक सञ्जालमार्फत सुझाव पनि माग गरेका छन्। उनले फेसबुक र ट्विटरका म्यासेज बक्समा कार्यक्रमहरूमा धेरैलाई आसन ग्रहण गराएर समय बर्बाद गर्नुभएन भन्ने सुझाव आएको बताएका छन्।
'तिनै सुझावलाई मध्यनजर गरेर हाम्रो पार्टीले अस्तिको सचिवालय बैठकबाट यस सम्बन्धी निर्णय गरेको छ। यसैगरी अब अनुहारै छोपिने गरी खादा, माला र कोटभन्दा ठूला ब्याज लगाउने प्रचलन पनि बन्द गर्नुपर्छ। कार्यक्रमहरूमा औपचारिकताका लागि धेरैलाई आसन ग्रहण गराउने र खादा, मालाले पुर्ने भद्दा चलन हटाएर समयलाई काममा लगाउने विषयमा तपाईंहरूका अरू के सुझावहरु छन्?,' उनले फेसबुकमा लेखेका छन्।
