नेकपा एमालेले अन्तरपार्टी निर्देशन 'अपानि' जारी गर्दै पार्टी र जनसंगठनका कार्यक्रममा जीवित नेतामध्ये पार्टी अध्यक्ष केपी ओलीको मात्रै फोटो मञ्चमा राख्न भनेको छ।
शुक्रबार केन्द्रीय सदस्यहरूलाई पठाइएको अपानिमा सार्वजनिक कार्यक्रमहरूमा पार्टी र जनसंगठनका विभिन्न तहका नेता कार्यकर्ताको अनावश्यक फोटो प्रयोग भएकाले निरूत्साहित गर्न खोजिएको बताइएको छ।
कार्यक्रमको गरिमा र मर्यादा बढाउन अबदेखि पार्टी र जनसंगठनले आयोजना गर्ने सार्वजनिक कार्यक्रममा तीन अग्रज नेताहरू; संस्थापक महासचिव पुष्पलाल, जननेता मदन भण्डारी र पूर्वअध्यक्ष मनमोहन अधिकारीका अतिरिक्त पार्टी अध्यक्षबाहेक अरूको फोटो प्रयोग नगर्ने निर्णय गरेको उल्लेख छ।
त्यस्तै कार्यक्रमको मञ्च वक्ताले मात्र प्रयोग गर्ने गरी अतिथि र वक्ताहरूलाई दर्शकदीर्घामा नै मर्यादित ढंगले आसनको व्यवस्था मिलाउन भनेको छ।
अपानिमार्फत् एमालेले कार्यक्रम सुरू भएपछि अन्त्य नहुँदासम्म आसन ग्रहणको उद्घोषण गरिरहने परम्परा अन्त्य गर्ने निर्णय गरेको बताएको छ।
कार्यक्रममा ब्याज, माला र खादाको अनावश्यक प्रयोग नगर्न र कार्यक्रमलाई भड्किलो नबनाउन समेत एमालेले अपानिमार्फत निर्देशन दिएको छ।
त्यस्तै एमालेले सामाजिक सञ्जालमा अनधिकृत र अज्ञात व्यक्तिहरूबाट पार्टीको नाम, लोगो र झन्डा दुरूपयोग भइरहेकोतर्फ पनि सचेत गराएको छ।
यसले पार्टीपंक्ति तथा समाजमा भ्रम सिर्जना गरेको भन्दै पार्टी र पार्टी नेतृत्वसँग जोडेर बनाइएका फेक-एकाउन्ट बन्द गर्ने पहलका लागि केन्द्रीय प्रचार तथा प्रकाशन विभागलाई निर्देशन दिइएको बताएको छ।
