प्रतिनिधि सभा बैठक फेरि स्थगित भएको छ।
आइतबार दिउँसो १ बजेका लागि बोलाइएको बैठक बस्दै नबसी मंगलबारसम्मका लागि स्थगित भएको हो।
अर्को बैठक मंगलबार दिउँसो ३ बजेका लागि बोलाइएको संसद सचिवालय स्रोतले जानकारी दिएको छ।
संसदको अवरोध हटाउने विषयमा प्रधानमन्त्री पुष्पकमल दाहाल ‘प्रचण्ड’ले आइतबार सर्वदलीय बैठक गरेका थिए।
प्रधानमन्त्रीको कार्यालय सिंहदरबारमा बसेको आजको बैठकमा कुनै निष्कर्ष ननिस्किएपछि भोलि फेरि बस्ने गरी सकिएको छ।
‘भोलि ४ बजे फेरि बस्ने गरी बैठक सकिएको छ,’ बैठकमा सहभागी नेकपा (एमाले) संसदीय दलका उपनेता सुवास नेम्वाङले भने,‘आज सबै विषयमा बृहत छलफल भयो। तर कुनै निष्कर्षमा पुगिएन।’
विमानस्थलबाहिर बरामद भएको ६० किलो बढी सुन प्रकरणमा उच्चस्तरीय छानबिन समिति माग गर्दै प्रमुख प्रतिपक्षी एमालेले साउन १० यता निरन्तर संसद अवरोध गरिरहेको छ।
आजको बैठकमा उपप्रधान तथा गृहमन्त्री नारायणकाजी श्रेष्ठले सुन प्रकरणको छानबिन नेपाल प्रहरीको केन्द्रीय अनुसन्धान ब्युरो (सिआइबी) ले गरिरहेकाले अझै १५ दिनसम्म कुर्नुपर्ने बताएका थिए।
‘१५ दिन सिआइबीलाई कुरौं। उसको छानबिन पूर्ण भएन भने छानबिन समिति बनाउँला भन्ने कुरा गृहमन्त्रीले राख्नुभयो,’ बैठकमा सहभागी एक नेताले भने,‘उहाँको प्रस्तावमा एमालेबाहेक अरू सबै दल लगभग सहमत भएजस्तो देखियो। एमालेका साथीहरूले आज हाम्रो अध्यक्ष अस्वस्थ हुनुहुन्छ। भोलि फेरि कुरा गरौं भन्नुभएको छ।’
बैठकमा प्रधानमन्त्री प्रचण्डले सुन प्रकरणसहित अरू थुप्रै भ्रष्टाचारका मुद्दाको जरैदेखि अनुसन्धान गर्ने गरी छानबिन समिति गठन गर्न सकिने बताएका थिए।