आफैंले डाकेको प्रदेश सभा बैठक छलेर हिँडेको भन्दै कोशीको सत्ता गठबन्धनले उपसभामुख सृजना दनुवारको भूमिकाप्रति आपत्ति प्रकट गरेको छ।
आज बिहान आठ बजेका लागि आफैंले बोलाएको कार्यव्यवस्था समिति बैठक छाडेर उपसभामुख सुटुक्क काठमाडौं गएकी थिइन्। अघिल्लै दिन एमाले र राप्रपाका गरी ८ ज्येष्ठ सांसदले बिदा लिएपछि उनले कांग्रेसका इस्राइल मन्सुरीलाई सभा चलाउने जिम्मा दिएको पत्र पठाएकी थिइन्। आफू अचानक बिरामी परेको पनि उनले पत्रमा लेखेकी छन्।
गठबन्धन दलहरूको विराटनगरमा सम्पन्न बैठकपछि मुख्यमन्त्री उद्धव थापाले उपसभामुखले संसदीय मूल्यविपरीत काम गरेको प्रतिक्रिया दिएका छन्।
‘उपसभामुखले सदनको बैठक छल्ने जे काम गर्नुभएको छ यो गम्भीर भूल गर्नुभएको छ र यो संसदीय मूल्य, मान्यताविपरीत हो’, उनले भने, ‘अब आज विश्वासको मत लिने प्रस्तावमा छलफल हुने सम्भावना छैन, यो बैठक स्थगित गरेर अर्को कुनै दिन विश्वासको मत लिन्छु।’
उनले विश्वासको मत लिने पर्याप्त सम्भावना रहेको र प्रशस्त विकल्प रहेको पनि बताएका छन्।
उपसभामुख सिर्जना दनुवारको पछिल्लो भूमिकाप्रति असन्तुष्टि जनाएका मुख्यमन्त्री थापाले संवैधानिक, कानुनी, संसदीय सबै प्रकारको लडाइँ सुरू भएको पनि बताए।
विपक्षी दलसँग बजेट प्रतिस्थापनका विषयमा एक प्रकारको सहमति बनाएपछि बैठक सहज रूपमा सञ्चालन हुने अपेक्षा गरे पनि नेकपा एमालेको भनाइ र गराइमा फरक परेको मुख्यमन्त्री थापाको भनाइ छ।
यो पनि:
सुटुक्क काठमाडौं उडेकी कोशीकी उपसभामुखले मन्सुरीलाई दिइन् बैठक चलाउने जिम्मेवारी
