नेकपा (एकीकृत समाजवादी)का अध्यक्ष माधवकुमार नेपालले आगामी कार्तिक मसान्तभित्र पुरानो संगठित सदस्यता नवीकरण गर्न र मंसिर १० गतेभित्र प्रमाणीकरण गर्न प्रस्ताव गरेका छन्।
मंगलबारबाट सुरू भएको पार्टी केन्द्रीय कमिटीको बैठकमा अध्यक्ष नेपालले भदौ २० गतेभित्र पार्टी कमिटी र जनवर्गीय, पेशागत तथा सामुदायिक संठनका कमिटीको बैठक बसेर योजना बनाउन प्रस्ताव गरेका हुन्।
‘पार्टी सदस्यता वितरण र नवीकरण गर्ने कार्य निरन्तर रूपमा चलिरहन सक्छ तर महाधिवेशनको प्रक्रियामा सहभागी हुन भने कार्तिक मसान्तभित्र नवीकरण र वितरण भई मंसिर १० गतेभित्र प्रमाणीकरणको लागि केन्द्रीय सङ्गठन विभागमा पठाइएका सदस्यहरूले मात्र पाइने छ,’ अध्यक्ष नेपालले राजनीतिक प्रतिवेदन प्रस्तुत गर्दै भने।
भदौ र असोजमा दस्तावेजहरूको मस्यौदा गरिसकिने छ र कात्तिक र मंसिर महिनामा दस्तावेजमाथि पार्टीव्यापि रूपमा छलफल र बहस चलाइने पनि उनले बताए। यस अवधिका प्रशिक्षण पनि महाधिवेशन केन्द्रित नै हुने अध्यक्ष नेपालको भनाइ छ।
आगामी असोज एक महिना एकीकृत समाजवादी ले उठाउँदै आएका र उठाउनु पर्ने आर्थिक, सामाजिक, शैक्षिक, सुशासन आदि मुद्दाहरूमा केन्द्रित भएर राष्ट्रिय अभियान चलाइने पनि अध्यक्ष नेपालले बताए।
‘समृद्धि र समाजवादको नेतृत्व गर्न नेकपा (एकीकृत समाजवादी) किन अपरिहार्य छ भन्ने कुरा स्थापित गर्नु यसको उद्देश्य हुने छ। यस क्रममा नयाँ सदस्यताका लागि अभियान चलाइने छ र महाधिवेशनको सन्देश राष्ट्रव्यापि बनाइने छ,’ दस्तावेज प्रस्तुत गर्दै अध्यक्ष नेपालले भने, ‘महाधिवेशनलाई लक्षित गरेर पार्टीमा युवा सदस्यहरूको वृद्धि गर्न युवा—विद्यार्थी विशेष कार्यक्रम गरिनेछ।’
