नेपाल विद्यार्थी संघले इन्जिनियरिङ अध्ययन संस्थानलाई शुल्क वृद्धि फिर्ता लिन आग्रह गरेको छ।
इन्जिनियरिङतर्फ स्नातक तहका लागि संस्थानले भदौ ४ गते सूचना निकालेर शुल्क वृद्धि गरेको थियो।
३ लाख १३ हजार रुपैयाँ शुल्क रहेकोमा वृद्धि गरी ७ लाख ७५ हजार ४ सय २० रुपैयाँ पुर्याएपछि विद्यार्थी संघसंगठनहरूले विरोध गरिरहेका छन्।
बुधबार काठमाडौंमा पत्रकार सम्मेलन गर्दै नेविसंघले त्रिभुवन विश्वविद्यालय र इन्जिनियरिङ अध्ययन संस्थान (आइओई) लाई शुल्क वृद्धि फिर्ता लिन आग्रह गरेको हो।
‘पैसा छैन भनेर चर्को शुल्क लिन खोज्ने अनि त्रिविका पदाधिकारीदेखि आइओइका डिन विदेश भ्रमणमा जाने? चर्को शुल्क फिर्ता नगरे उहाँहरू कुनै देश भ्रमणमा जान पाउनुहुन्न,’ नेविसंघ अध्यक्ष दुजाङ शेर्पाले भने।
शुल्कवृद्धि फिर्ताको माग गर्दै मंगलबारदेखि पुल्चोक इन्जिनियरिङ क्याम्पस इकाइ अध्यक्ष सुलभ चापागाई अनशन बसेको र उक्त अनशनमा नेविसंघ केन्द्रीय समितिको ऐक्यबद्धता रहेको शेर्पाले बताए।
‘तीन दिनभित्र शुल्कवृद्धि फिर्ता नभए कडा आन्दोलनमा उत्रन्छौं,’ उनले भने, ‘प्रधानमन्त्री पुष्पकमल दाहाल प्रचण्ड निवास बालुवाटार पुगेर शुल्क वृद्धिविरूद्ध प्रदर्शन गर्छौं।’
इन्जिनियरिङ अध्ययन संस्थानले गत भदौ ४ गते सूचना निकालेर स्नातक तहअन्तर्गत बीई, बीआर्कका लागि शुल्क वृद्धि भएको जानकारी गराएको थियो।
