उपप्रधान तथा रक्षा मन्त्री पूर्णबहादुर खड्काले राष्ट्रिय मान्यता प्राप्त दलहरूबीच बुधबार भएको सहमति प्रतिनिधि सभालाई जानकारी गराएका छन्।
संसदमा प्रतिनिधित्व गर्ने ७ राजनीतिक दलका बीचमा विभिन्न समयका भएका सुन तस्करी जाँचबुझ गरेर प्रतिवेदन बुझाउन उच्चस्तरीय समिति बनाउने सहमति भएर हस्ताक्षर भएको थियो।
रक्षा मन्त्री खड्काले त्यसको जानकारी सदनलाई गराएका हुन्।
‘यसरी सहमति भएर एउटा सकारात्मक वातावरण बनेको छ, दलहरूको बीचमा, फेरि सहकार्य एकताको माध्यमद्वारा देश र जनताको हितमा काम गर्ने एउटा नयाँ सकल्प पुनः भएको छ। यसले सिंगो संसदलाई, नेपाली जनतालाई पनि ठूलो आशा र भरोसाको जग बनाउने छ,’ उनले भने।
संघीय संसदमा उपस्थित राष्ट्रिय मान्यता प्राप्त दलहरूबीचको सहमतिका दुई बुँदा
१. मिति २०८० साल श्रावण २ गते विदेशबाट अवैध ढंगले पैठारी (तस्करी) गरिएको सुन त्रिभुवन अन्तर्राष्ट्रिय विमानस्थलबाट बाहिर लगिरहेको अवस्थामा राजश्व अनुसन्धान विभागबाट पक्राउ परेको थियो। उक्त विषय नेपाल प्रहरीको केन्द्रीय अनुसन्धान ब्यूरोले अनुसन्धान, छानबिन गरिरहेको सर्वविदित्तै छ। केन्द्रीय अनुसन्धान ब्यूरोले निष्पक्ष अनुसन्धान, छानबिन गरी सुन तस्करीमा संलग्न व्यक्तिहरूलाई अभियोजन गर्नेछ ।
२. विदेशबाट इलेक्ट्रिक सिगरेटमा सुन राखी अवैध पैठारी (तस्करी) गरिएको, मिति २०८० श्रावण २ गते ब्रेक–सुमा राखी अवैध पैठारी (तस्करी) गरिएको सुन लगायत पटक-पटक सुन तस्करी भई मुलुकभित्र आइरहेको विषयलाई गम्भीरतापूर्वक लिई स्वतन्त्र र निष्पक्ष छानबिन गर्न र यस्तो तस्करीजन्य कार्यको पूर्ण रूपमा नियन्त्रण गर्न मौजुदा कानूनमा गर्नुपर्ने परिमार्जन, संरचनागत सुधार र पटक पटकको सुन तस्करी सम्बन्धमा भएका छानबिन अनुसन्धान बारे समेत अध्ययन गरी सुझाव सहितको प्रतिवेदन पेश गर्न जाँचबुझ आयोग ऐन, २०२६ बमोजिम २०८०/०६/०५ गते नेपाल सरकारले आयोग गठन गरी त्यसै दिनदेखि आयोगले कार्य प्रारम्भ गर्नेछ।
