त्रिभुवन विश्वविद्यालयका पदाधिकारी र विभिन्न विद्यार्थी संघसंगठनका पदाधिकारीबीच इन्जिनियरिङ अध्ययन संस्थानले गरेको शुल्कवृद्धि फिर्ता लिनेसहित ५ बुँदे सहमति भएको छ।
संस्थानले त्रिविका आंगिक क्याम्पस स्नातक तहमा शुल्कवृद्धि गरेपछि विद्यार्थी संघसंगठनहरूले आन्दोलन गरेका थिए भने नेविसंघ पुल्चोक क्याम्पसका नेता सुलभ चापागाईं आमरण अनशनमा बसेका थिए।
स्वास्थ्यमा समस्या देखिएपछि चापागाईंलाई वीर अस्पताल लगिएको थियो। त्रिवि र विद्यार्थी संघसंगठनहरूबीच बुधबार सहमति भएसँगै चापागाईंले अनशन तोडेका थिए। तर उनले असन्तुष्टि जनाइरहेका छन्।
‘नेविसंघ पुल्चोक इकाइ सभापति पदबाट राजीनामा दिएको छु,’ चापागाईंले फेसबुकमा लेखेका छन्। उनी गत भदौ ४ गतेदेखि अनशन बसेका थिए।
त्रिवि उपकुलपति धर्मकान्त बाँस्कोटासहित पदाधिकारीहरू, डिनहरू, नेविसंघ अध्यक्ष दुजाङ शेर्पा, अखिल (क्रान्तिकारी) अध्यक्ष पञ्चा सिंह, अनेरास्ववियू अध्यक्ष आरती लामा, समाजवादी विद्यार्थी यूनियन अध्यक्ष रमेश यादव र अखिल (क्रान्तिकारी) अध्यक्ष प्रकाश सीले ५ बुँदे सहमति पत्रमा हस्ताक्षर गरेका हुन्।
इन्जिनियरिङ अध्ययन संस्थानअन्तर्गत हाल वृद्धि गरिएको शुल्क फिर्ता लिन निर्देशन दिनेजस्ता ५ सहमति भएका छन्।
३ लाख १८ हजार रुपैयाँ शुल्क रहेकोमा संस्थानले वृद्धि गरी ७ लाख ७५ हजार ४ सय २० रुपैयाँ पुर्याएपछि विद्यार्थीहरू आन्दोलनमा उत्रिएका थिए। तर त्रिवि पदाधिकारीहरूसँग विद्यार्थी संघसंगठनहरूले 'उधारो' सहमति गरेको भन्दै अनेरास्ववियुले असन्तुष्टि जनाएको छ।
हेर्नुस् सहमति पत्र:
