नेकपा एमाले लुम्बिनी प्रदेशको पहिलो अधिवेशन बुटवलमा सुरू भएको छ।
बुटवलको अन्तर्राष्ट्रिय सम्मेलन केन्द्रमा दुई दिनसम्म चल्ने अधिवेशन एमाले अध्यक्ष एवं पूर्व प्रधानमन्त्री केपी शर्मा ओलीले दिउँसो साढे २ बजे उद्घाटन गरेका हुन्।
यसअघि १२ बजे कार्यक्रम उद्घाटन गरिने कार्यतालिका तय गरिएको थियो। कार्यक्रममा एमाले उपमहासचिव प्रदीप ज्ञवाली, सचिवहरू गोकर्ण विष्ट र पद्मा अर्यालले सम्बोधन गरिसकेका छन्।
सात प्रदेशमध्ये सबैभन्दा पहिले आयोजना गरिएकोले लुम्बिनी अधिवेशनलाई एमाले नेता कार्यकर्ताले चासोको रूपमा लिएका छन्।
उद्घाटन समारोहमा पार्टीका उपाध्यक्षहरू विष्णु पौडेल र युवराज ज्ञवाली, महासचिव शंकर पोख्रेल, उपमहासचिव प्रदीप ज्ञवाली, सचिवहरू गोकर्ण विष्ट, छविलाल विश्वकर्मा एवं प्रदेशका इन्चार्ज पद्मा अर्यालका साथै पोलिटब्युरो सदस्यहरू, केन्द्रीय सदस्यहरू, केन्द्रीय आयोगका पदाधिकारी तथा सदस्यहरूको उपस्थिति छन्।
भोलिसम्म चल्ने अधिवेशनले नयाँ नेतृत्व चयन गर्ने भएकोले नेता कार्यकर्ताहरू उत्साहित देखिएका छन्।
सम्मेलनका लागि १२ वटै जिल्लाका ८२ हजार ८ सय ९५ पार्टी सदस्यहरूबाट छानिएका प्रतिनिधि तथा विभिन्न २३ वटा जनसंगठनहरूबाट छानिएका १ हजार ४ प्रतिनिधि सहभागी छन्।
नवलपरासीबाट ५२ जना प्रतिनिधि छनोट भएका छन्।
अधिवेशनले २०५ सदस्यीय नयाँ नेतृत्व चयन गर्नेछ।
अधिवेशनबाट नयाँ नेतृत्वका लागि अहिलेका अध्यक्ष राधाकृष्ण कँडेल र केन्द्रीय सदस्य हरि रिजालको बीचमा प्रतिष्पर्धा हुने देखिएको छ।