नुवाकोटका सांसदहरुले प्रधानमन्त्री पुष्पकमल दाहाल ‘प्रचण्ड’ लाई भेट गरी जिल्लाका समस्या समाधानका लागि ध्यानाकर्षण गराएका छन्।
शनिबार बिहान बालुवाटार पुगेर सांसदहरूले जिल्लाका विभिन्न समस्याहरुका बारेमा प्रधानमन्त्रीको ध्यानाकर्षण गराएका हुन्।
विशेषगरी नुवाकोटको विकासको मेरूदण्डका रूपमा लिइएको पासाङ ल्हामु राजमार्ग अन्तर्गत तिनपिप्ले-पिपलटार सडक खण्ड यसैवर्ष कालोपत्र गर्न प्रधानमन्त्रीको ध्यानाकर्षण गराए।
यो वर्ष तिनपिप्ले - रानिपौवाको लागि मात्र बजेट निकासा भएको हुँदा आन्तरिक बजेटबाट स्रोत व्यवस्थापन गरी सडक कालोपत्र गर्ने व्यवस्था मिलाइदिन प्रधानमन्त्रीको ध्यानाकर्षण गराए।
प्रधानमन्त्री प्रचण्डले सोबारेमा आफू जानकार रहेको र बाटोलाई यही वर्ष सम्पन्न गर्ने विश्वास दिलाए।
सांसदहरुले बञ्चरेडाँडा ल्याण्डफिल साइटको समस्याबारे पनि प्रधानमन्त्रीको ध्यानाकर्षण गराए।
ल्याण्डफिल साईटले पारेको समस्या र त्यस भेगका नागरिकले भोग्नुपरेको समस्या र सरकारले पटक-पटक गरेको सम्झौताप्रति भएको बेवास्ताबारे पनि प्रधानमन्त्री प्रचण्डसमक्ष कुरा राखेका थिए।
प्रधानमन्त्रीले अबिलम्ब उक्त समस्याको बारेमा सम्वन्धित निकाय सँग छलफल गरेर दीर्घकालीन समस्या समाधानको उपाय खोजिने प्रतिवद्धता व्यक्त गरेको प्रधानमन्त्रीको सचिवालयले जानकारी दिएको छ।
