नेकपा (माओवादी केन्द्र)को बागमती प्रदेश कमिटीले मातहतका पार्टी कार्यालयहरूमा प्रदेश अध्यक्षको समेत फोटो अनिवार्य रूपमा राख्नुपर्ने कार्यविधि तयार पारेर सर्कुलर गरेको छ।
प्रदेश कमिटीले तयार पारेर जिल्ला कमिटीमा सकुर्लर गरेको कार्यविधिमा कार्यालयमा अनिवार्य रूपमा राख्नुपर्नेमा अन्तर्राष्ट्रिय गीत, सहिदहरूको फोटो, पाँच टाउको (मार्क्स, एंगेल्स, लेनिन, स्टालिन, माओ त्से तुङ), पार्टी केन्द्रीय अध्यक्षको फोटोसँगै प्रदेश अध्यक्षको फोटो पनि राख्नुपर्ने उल्लेख छ।
माओवादी केन्द्रका बागमती प्रदेश अध्यक्ष सरल सहयात्री पौडेल छन्। उनी २०७८ पुस ६ गते प्रदेश अध्यक्ष निर्वाचित भएका थिए।
माओवादीले पार्टी कार्यालयहरूमा पार्टी अध्यक्षको फोटो राख्ने गरे पनि प्रदेश अध्यक्षको समेत फोटो राख्ने गरी कार्यविधि बनेको यो पहिलो पटक हो।
माओवादीका बागमती प्रदेश सचिव इन्द्रबहादुर थिङले भने अहिले पठाइएको सर्कुलर आधिकारिक नभएको बताए।
उनले त्यस विषयमा सामान्य छलफल चले पनि सहमति नभएको कुरा सर्कुलरका रूपमा मातहतका कार्यालयमा पुगेको बताए।
‘हामीले पोहोरतिर एउटा सर्कुलर पठाएका थियौं, त्यो नै आधिकारिक हो, अहिले सर्कुलर भनेर मातहतका कार्यालयमा पुगेको इमेल आधिकारिक होइन, भाइहरूले झुक्किएर पठाएका रहेछन्,’ उनले भने।
मातहतका कार्यालयहरूका प्रदेश अध्यक्षको फोटो राख्ने कुरा निर्णय र सहमति हुनु त परको कुरा कल्पनासम्म पनि गर्न नसकिने उनले बताए।
‘छ-सात महिनाअघि नै एउटा सर्कुलर पठाइएको थियो, त्यो नै आधिकारिक हो। अहिले सामान्य पठाउने भन्ने थियो, तर सहमति भएको छैन। गएको इमेल पनि आधिकारिक होइन, झुक्किएर गएको हो,’ उनले भने, ‘माओवादीमा यस्तो कसैले कल्पना पनि गरेको छैन। भाइहरूले कसरी टाइप गर्न पुगे।’
प्रदेश अध्यक्ष सरल सहयात्री पौडेल पनि कार्यालयबाट अनधिकृत तरिकाले सर्कुलर लगेर तल पठाइएको हुनसक्ने बताए। उनले पनि प्रदेश अध्यक्षसमेतको फोटो राख्ने निर्देशनसहितको सर्कुलर नपठाइएको बताए।
‘तल सर्कुलर पठाउने र समाचार संस्थामा पुर्याउने एउटै व्यक्ति हुन सक्छ। प्रदेश अध्यक्षलाई अप्ठ्यारो पार्ने नियतले त्यस्तो गरिएको हुनसक्छ। अनुमगन गर्न निर्देशन दिएको छु,’ उनले सेतोपाटीसँग भने।
‘नेपाल कम्युनिष्ट पार्टी(माओवादी केन्द्र) बागमती प्रदेश समिति कार्यालय व्यवस्थापनबारे कार्यविधि २०८०’ मा यस्तो प्रावधान राखिएको हो।
जनवादी केन्द्रीयतामा विश्वास गर्ने माओवादीले अहिलेसम्म ब्यानर र पार्टी कार्यालयहरूमा पार्टी अध्यक्ष पुष्पकमल दाहाल ‘प्रचण्ड’ को फोटोमात्रै राख्दै आएको छ।
केही समयअघि मधेश प्रदेशको वीरगञ्जमा भएको पार्टीको प्रशिक्षण कार्यक्रमको ब्यानरमा वरिष्ठ उपाध्यक्ष नारायणकाजी श्रेष्ठको मात्रै फोटो राख्दा विवाद भएको थियो।
‘पार्टीका सबै तह र कमिटीहरूमा एक व्यवस्थित र सुविधासम्पन्न कार्यालय हुन जरूरी छ, जुन भौतिक पूर्वाधार सम्पन्न तथा सबै स्रोत र साधनद्वारा व्यवस्थित होस,’ कार्यविधिमा उल्लेख छ, ‘कार्यालय सञ्चालन गर्दा पार्टी र संगठनको चलअचल सम्पत्ति संरक्षण, बैठक भेला तथा संगठनका गतिविधिहरू व्यवस्थापन, संगठनका डाटाहरू सुरक्षित र व्यवस्थित गर्न सहयोग पुग्दछ । पार्टीका सबै दस्तावेजहरू सुरक्षित तथा अभिलेखीकरण गर्नको लागि पनि व्यवस्थित कार्यालयको जरूरी हुन्छ।’
सात बुँदे कार्यविधिमा कार्यालय व्यवस्थापनसम्बन्धी नीति र प्रक्रियाहरूको अभाव, कार्यालय स्थापनामा रहेका अरूची, कार्यालय व्यवस्थापनसम्बन्धी महत्वबोध नहुनुलगायत विषयलाई कार्यालय व्यवस्थापनको समस्या मानिएको छ।
