ताप्लेजुङमा प्रहरी र प्रदेश सांसद पक्षबीच भएको झडपको विषयमा सोमबार पनि छलफल हुने भएको छ।
गत शुक्रबार फुङलिङमा भएको एक कोण सभामा कोशी प्रदेश नेपाली कांग्रेसका सांसद खगेनसिंङ हाङगामले अराजक अभिव्यक्ति दिएका थिए। उनले जिल्ला प्रहरी कार्यालय ताप्लेजुङका प्रमुख प्रहरी नायब उपरीक्षक (डिएसपी) राजन लिम्बू र उनका परिवारलाई ज्यान मार्ने धम्की दिएका थिए। त्यसअघि सांसद नेतृत्वको समूह र प्रहरीबीच झडप समेत भएको थियो।
उनको अभिव्यक्ति र घटना थप बल्झिन सक्ने भन्दै कोशी प्रदेश कार्यालयले घटनाबारे छानबिन गर्न प्रहरी उपरीक्षक ऋषिराम कँडेललाई पठाएको थियो।
उनी अहिले ताप्लेजुङमा पुगेका छन्।
आइतबार एक चरणमा दुई पक्ष बसेर छलफल गरिएको उनले बताए।
‘हिजो माननीयज्यू पक्षसँग एक चरणको छलफल भयो। आज फेरि बस्दैछौं,’ उनले भने।
उनका अनुसार आइतबार बसेको छलफलमा सांसद हाङगाम उपस्थित थिएनन्। सोमबार दिउँसो २ बजेपछि बस्ने बैठकमा भने सांसदसहित बस्ने तयारी रहेको बताए।
‘यो घटना थप बल्झिन नदिन म आएको हुँ। छलफल गरी कसको के कस्तो गल्ती भयो। दोषी देखिए कारबाही गर्ने भन्नेतर्फ केन्द्रित छौं,’ एसपी कँडेलले भने।
सांसद हाङगामले गत शुक्रबार डिएसपी र उनको परिवारलाई ज्यान मार्ने धम्की दिएका थिए। बिहीबार राति करिब ११ बजेदेखि प्रहरी र स्थानीयको विवाद भएको थियो। दुई पक्षबीच झडप हुँदा सांसद हाङगाम आफैंले पनि प्रहरीमाथि हातपात गरेका थिए।
ताप्लेजुङमा प्रहरी-स्थानीयबीच विवाद बढेपछि पाँचथरबाट सईको नेतृत्वमा २० जनाको टोली झिकाइएको थियो।
यो पनि: कांग्रेस प्रदेश सांसदलाई प्रश्न- डिएसपी र उनको परिवारलाई ज्यान मार्ने धम्की दिन मिल्छ?
