नेकपा (एमाले) कर्णालीमा केन्द्रीय सदस्यहरू प्रदेश अध्यक्षको आकांक्षाबाट बाहिरिएका छन्।
असोज १० र ११ गते हुने प्रदेश अधिवेशनमा पोलिटब्युरो सदस्यहरू नै अध्यक्षको आकांक्षीका रूपमा थिए।
एमालेको ९३ सदस्यीय पोलिटब्युरोमा कर्णाली प्रदेशबाट ४ जनाको प्रतिनिधित्व छ। गुलाबजंग शाह, भैरवसुन्दर श्रेष्ठ, मोहन बानियाँ र लक्ष्मी पोखरेल पोलिटब्युरो सदस्य छन्।
भैरवसुन्दर श्रेष्ठ राष्ट्रिय सभा सदस्य भएकाले उनले कार्यकारी पदमा उम्मेदवारी दिन मिल्दैन। बाँकी तीन जना प्रदेशको आकांक्षीका रूपमा थिए।
त्यसका अतिरिक्त केन्द्रीय सदस्य प्रेमबहादुर सिंह, विष्णु रिजाल, निरज आचार्य, दल रावललगायत पनि प्रदेश अध्यक्षको दौडमा थिए।
उनीहरू प्रतिस्पर्धाबाट बाहिरिएको एक नेताले जानकारी दिए। प्रेमबहादुर सिंहबाहेक अरू केन्द्रीय नेताहरू प्रदेश अधिवेशनको प्रतिनिधि बनेका छैनन्। प्रदेश अधिवेशन प्रतिनिधि नबनेकाहरू प्रदेश अध्यक्षको उम्मेदवार बन्न पाउँदैनन्। अहिले प्रदेश कमिटीमा रहेकाहरू पनि संगठन कमिटी भएकाले प्रतिनिधि चुनिएरै आउनुपर्छ।
एमाले कर्णालीले भदौ २७ गतेदेखि प्रतिनिधि चयन थालेको थियो। सल्यानको बनगाड कुपिन्डे नगरपालिकाबाहेक सबै ठाउँमा प्रतिनिधि चयन टुंगिएको केन्द्रीय सदस्य निरज आचार्यले जानकारी दिए। मंगलबारसम्ममा प्रतिनिधि छनोट सकिने उनले बताए।
प्रतिनिधि चयनमा कतैकतै विवाद सिर्जना भए पनि सर्वसम्मत रूपमा छनोट भएको प्रदेश सचिव टेकराज पछाईंले जानकारी दिए।
‘कतिपय ठाउँमा दाबेदार धेरै भएपछि सामान्य विवाद भएको थियो। विवाद समाधान भइसक्यो। निर्वाचन गर्नुपर्ने अवस्था सिर्जना कतै भएन,’ उनले सेतोपाटीसँग भने।
५१ हजार ७ सय ५० प्रनिधिबाट ६ सय १० जना प्रतिनिधि चुनिएर आउने सचिव पछाईंले जानकारी दिए।
१० जिल्लाका ७९ (५४ गाउँपालिका, २५ नगरपालिका) पालिकाबाट सय सदस्य बराबर एकजना प्रतिनिधि छानिएको पछाईंले बताए। सय जना प्रतिनिधि भाग लगाउँदा ५० शेष रहेमा त्यसबाट थप एक जना प्रतिनिधि निर्वाचित हुने व्यवस्था रहेको पनि उनले बताए।
७५ संगठित सदस्यबाट एक जना दलित र दलितको हकमा एउटा प्रदेश सभाबाट एक जनाको प्रतिनिधित्व रहने बताइएको छ।
को-को छन् प्रदेश अध्यक्ष दाबेदार?
मुलुक संघीयतामा गएपछि एमालेले पहिलो पटक प्रदेश अधिवेशन गर्न लागेको हो।
कर्णाली प्रदेशको आगामी नेतृत्वका लागि उपाध्यक्ष लालबहादुर महतारा, मीनबहादुर शाही, ध्रुवकुमार शाही र राजबहादुर शाही प्रतिस्पर्धामा छन्।
अहिले अध्यक्ष रहेका विनोद शाह प्रदेश सभा सदस्यमा निर्वाचित भएकाले उनी अध्यक्षमा दोहिरिन पाउँदैनन्।
एमाले लुम्बिनीको अधिवेशन भदौ १६ र १७ गते बुटवलमा भएको थियो। लुम्बिनीमा उपाध्यक्ष विष्णु पौडेल र महासचिव शंकर पोखरेलको प्रतिस्पर्धा देखिएको थियो।
कडा प्रतिस्पर्धाबीच उपाध्यक्ष पौडेल पक्षमा राधाकृष्ण कँडेल प्रदेश अध्यक्षमा निर्वाचित भएका थिए। उनका प्रतिस्पर्धी महासचिव पोखरेल खेमाका हरि रिजाल २ मतले पराजित भएका थिए।
कर्णाली प्रदेशमा पनि यसको प्रभाव पर्न सक्ने एक नेताले बताए।
तथापि उपाध्यक्ष पौडेल र महासचिव पोखरेलकै नाममा प्यानल खडा हुने सम्भावना नदेखिएको ती नेताको दाबी छ।
कर्णाली प्रदेशमा दुई स्थायी कमिटी सदस्य यामलाल कँडेल र गोरखबहादुर बोगटीबीच प्रतिस्पर्धा छ। यी दुई नेताले अहिले त्यहाँ समूहबन्दीको प्रयास गरिरहेको ती नेताले बताए।
एमाले कर्णाली प्रदेश संसदीय दलका नेतासमेत रहेका कँडेलले ध्रुवकुमार शाहीलाई प्रदेश अध्यक्षमा अघि सार्ने तयारी गरिरहेका छन्।
नेकपा कालमा शाही माधवकुमार नेपाल समूहमा थिए। पार्टीभित्र विवाद बढ्दै जाँदा उनी अध्यक्ष केपी शर्मा ओली खेमामा लागे। गत वर्षको प्रतिनिधि सभा चुनावमा उनी कांग्रेसका उपसभापति पूर्णबहादुर खड्कासँग पराजित भएका थिए।
मानव अधिकार एलायन्सका अध्यक्ष रहिसकेका मीनबहादुर शाहीलाई गोरखबहादुर बोगटीको समर्थन रहेको छ। बोगटी पार्टीमा वरिष्ठ नेता ईश्वर पोखरेलनिकट हुन्। नेकपाकालमा उनी प्रदेश अध्यक्ष पनि थिए। त्यसपछि नेकपा विभाजनपछि गुलाबजंग शाह प्रदेश अध्यक्ष तोकिएका थिए।
अधिवेशन आउन १० दिन नै बाँकी रहँदा अहिलेको परिदृश्यमा फेरबदल आउने सम्भावना रहेको नेताहरू बताउँछन्।
एमाले कर्णालीको प्रदेश कमिटी २ सय ४२ सदस्यीय रहेको छ। अधिवेशनले १ सय ३५ सदस्यीय कमिटी निर्वाचित गर्ने छ।
एमालेमा जिल्ला अध्यक्षहरू प्रदेश कमिटीका पदेन सदस्य हुने छन्। प्रदेश अध्यक्ष पदेन पोलिटब्युरो सदस्य हुने व्यवस्था छ।
यो पनि पढ्नुस्:
