विद्यार्थीहरूले त्रिभुवन विश्वविद्यालय परीक्षा नियन्त्रण कार्यालय (प्रादेशिक)को गाडी जलाएका छन्।
विराटनगरस्थित महेन्द्र मोरङ क्याम्पसमा आन्दोलनरत विद्यार्थीहरूले बुधबार बिहान ५ बजे परीक्षा नियन्त्रण कार्यालयको बा १७ च ८२३८ नम्बरको गाडी जलाएको जिल्ला प्रहरी कार्यालय मोरङले जानकारी दियो।
जिल्ला प्रहरी कार्यालयका डिएसपी रञ्जन दाहालका अनुसार मानविकी संकायमा अध्ययनरत एक जना छात्राको २०७८ मंसिरमा लिएको परीक्षाको उत्तरपुस्तिका साटफेर गरेको भन्दै विद्यार्थी आन्दोलनमा छन्।
उनीहरूले नै बुधबार बिहान परीक्षा नियन्त्रण कार्यालयको गाडीमा आगजनी गरेका हुन्।
महेन्द्र मोरङ क्याम्पसमा अध्ययनरत एक छात्राको अंग्रेजी पुस्तिका साटफेर भएको विद्यार्थी संगठनको आरोप छ। विद्यार्थी संगठनले ती छात्राको उत्तरपुस्तिका परीक्षाका गार्ड राजन दत्तले आफ्नी छोरीको उत्तर पुस्तिकासँग साटिदिएको बताउँदै आएका छन्।
उत्तरपुस्तिका साटिएपछि ती छात्रा फेल भएको आन्दोलनरत विद्यार्थीहरूको भनाइ छ।
क्याम्पस प्रशासनले ती छात्रालाई पुनः परीक्षा दिन लगाएको र नतिजा प्रकाशन गर्न ढिलाइ गरेपछि विद्यार्थीहरू थप आन्दोलित भएका थिए।
आन्दोलनरत विद्यार्थी, महेन्द्र मोरङ क्याम्पस प्रमुख बाबुराम तिमल्सिना र त्रिविका सहायक परीक्षा नियन्त्रक डिल्ली प्रसाईंबीच मंगलबार विराटनगरकै डिग्री क्याम्पसमा छलफल भएको थियो।
छलफल निष्कर्षमा नपुगेपछि आन्दोलनरत विद्यार्थीले तिमिल्सना र प्रसाईंलाई डिग्री क्याम्पसको कार्यालयभित्रै थुनेका थिए।
थुनिएका क्याम्पस प्रमुख बाबुराम तिमल्सिना र सहायक परीक्षा नियन्त्रक डिल्ली प्रसाईंलाई राति १ बजे उद्धार गरिएको डिएसपी रञ्जन दाहालले बताए।
विद्यार्थीहरूले मंगलबार राति पनि आन्दोलन गरेको र बिहानपख गाडी जलाएको डिएसपी दाहालले बताए।
