राष्ट्रिय स्वतन्त्र पार्टी (रास्वपा)का सभापति रवि लामिछानेले पुराना पार्टीलाई झैं आफ्नो दललाई पनि आलोचना गर्न थालिएको बताएका छन्।
उनले परम्परागत राजनीतिक शक्तिलाई झैं हेर्न थालिएको भन्दै रास्वपा अरू पार्टीभन्दा फरक भएको बताएका छन्।
पार्टीको राजनीतिक, वैचारिक दस्तावेजका लागि सुझाव संकलन गर्न रोल्पाको थवाङ पुगेका सभापति लामिछानेले फेसबुक लाइभमार्फत् फरक देखाएका हुन्।
लामिछानेले राष्ट्रिय स्वतन्त्र पार्टीले प्राइमरी इलेक्सन गरेर नेता छान्ने विधि अघि सारेको बताए। रास्वपाले अहिले वडा तहमा संगठन विस्तार गरिरहेको छ। मंसिरदेखि महाधिवेशन प्रक्रिया पनि सुरू गर्नेछ। यी सबैमा प्राइमरी इलेक्सनमार्फत् नेतृत्व चयन गर्ने विधि अपनाउने लामिछानेले बताए। उनले यसरी नेता छान्ने र चुन्ने विधि अरू पार्टीमा नभएको दाबी गरे।
यस्तै पार्टीले परिवारवादलाई पार्टीमा निषेध गरेको पनि बताए।
‘अरू पार्टीमा परिवारका सदस्य सबै पार्टीमा हुन्छन्। जिम्मेवारीमा हुन्छन्। हामीले परिवारका सदस्यलाई पार्टीको जिम्मेवारीमा नरहने व्यवस्था गरेका छौं,’ उनले भने।
लामिछानेले देखाएको तेस्रो फरक दुई कार्यकालभन्दा बढी एउटै कमिटीमा बस्न नपाइने नीति रास्वपाको नीति हो। अरू पार्टीमा आजीवन पदमा बस्ने प्रवृत्ति रहेको भन्दै रास्वपामा यसभन्दा भिन्न रहेको लामिछानेको दाबी छ।
उनले अरू दलले जस्तो आफ्नो पार्टीले भ्रातृ संगठन पनि नबाउने बताए।
पार्टीमा परिवारवाद, आफन्तवाद, कार्यकर्तावाद, भ्रातृ संगठनवादले लाभमात्र होइन पहुँचलाई पनि नागरिक तहसम्म पुग्नबाट रोकेको उनले बताए। यसका कारण परिवारवाद, आफन्तवाद, कार्यकर्तावादका अतिरिक्त भ्रातृ संगठन बनाउन पनि निषेध गरेको उनको भनाइ छ।
‘हाम्रो पार्टीमा कोही कार्यकर्ता हुँदैनन्, सदस्यमात्रै हुन्छन्,’ उनले भने। उनले पार्टीलाई खुला, पहुँचयुक्त बनाउने पनि बताए।
‘कार्यकर्तालाई ठेक्कापट्टामा लगाउने आदि प्रवृत्ति अन्य दलमा छ,’ उनले भने, ‘यसलाई हामी निरुत्साहित गर्न चाहन्छौं। हामी भ्रातृ संगठन पार्टीको जीवनकालमा बनाउँदैनौं। यसका अतिरिक्त पार्टीको शासकीय स्वरूपमा पनि धेरै भिन्नता रहेको बताए।
रास्वपा दस्तावेज लेखनको अन्तिम चरणमा रहेको र त्यसैलाई समृद्ध बनाउन पार्टीका १८ जना सांसद, केन्द्रीय नेतालाई फरक-फरक जिल्ला खटाएर आफूले रोल्पा छानेको लामिछानेले बताए।
