नेपाली कांग्रेस रूपान्तरण अभियानले नेपाल शिक्षक महासंघको आह्वानमा काठमाडौंमा केन्द्रित आन्दोलनका माग सम्बोधन गर्न सरकारलाई आग्रह गरेको छ।
शुक्रबार विज्ञप्ति निकालेर रूपान्तरण अभियानले संघीय सरकारले गैरजिम्मेवारीपूर्वक विद्यालय शिक्षा विधेयक ल्याएको उल्लेख छ।
‘देशभरका विद्यालय बन्द गरेर शिक्षकहरू आन्दोलनमा होमिएका छन्। शिक्षा सेवा आयाेग लडेर र प्रतिस्पर्धा गरेर शिक्षक बनेका शिक्षित जमातलाई संघीय सरकार गैरजिम्मेवार बनेर स्थानीय सरकारकाे मातहतमा शिक्षक रहने गरी विधेयक ल्याएको छ,’ विज्ञप्तिमा भनिएको छ, ‘यो विधेयक सरासर गलत र अनुचित छ।’
एउटै विद्यालयमा पढाउने शिक्षककाे तलवमान पनि अमिल्दाे रहने गरेको उनीहरूले उल्लेख गरेका छन्।
‘शिक्षण पेसाको गरिमा कायम राख्न सबै पक्षको ध्यान जानु आवश्यक छ। आफूलाई पढाउने शिक्षक नै आफ्नो माग पूरा गराउन आन्दोलनमा सहभागी हुँदै गर्दा शिक्षा प्राप्त गर्न विधालायमा कुरेर बसेका विधार्थीहरूको बालमष्तिस्कमा के असर पर्ला भन्ने कुरामा सबै दल र सरकार सबैको ध्यान जाओस्,’ रूपान्तरण अभियानले निकालेको विज्ञप्तिमा भनिएको छ।
सरकार र सम्बन्धित पक्षले समयमै मागलाई सम्बोधन गर्दै विद्यार्थीहरुको पढाइलाई अवरुद्ध हुनबाट जोगाउनु पर्ने उनीहरूले बताएका छन्।
कांग्रेस केन्द्रीय सदस्य मधु आचार्य, नेताहरू जगदीश्वरनरसिंह केसी, ऋषिराम घिमिरे, रमेश धमला, मोहन बराल, उज्वल बराल, भूपेन्द्र थापा, सानु श्रेष्ठ, सन्तोष भट्टराई, प्रेमकृष्ण महर्जन, बिनिता खड्का, धनेन्द्र केसी, अच्चुत पौडेल, विनोद कार्की, विष्णु बस्नेत र उज्वल रामले विज्ञप्ति निकालेका हुन्।
