कार्यवाहक प्रधानमन्त्री पूर्णबहादुर खड्काले क्रिकेट पूर्वाधार निर्माण र व्यवसायीकरणका लागि यथेष्ट लगानीको वातावरण बनाउनुपर्ने अहिलेको आवश्यकता भएको बताएका छन्।
शुक्रबार काठमाडौंमा सुरू भएको नेपाल क्रिकेट संघको केन्द्रीय अधिवेशनलाई सम्बोधन गर्दै उनले समितताहरू हुँदाहुँदै पनि नेपाली क्रिकेटको प्रस्तुति गौरवयोग्य रहेको बताए।
उनले चुनौतीहरूका बाबजुद क्रिकेटमा प्राप्त उपलब्धिलाई रक्षा गर्दै बढोत्तरी गरेर यसका नियमाक निकायमा अवाञ्छित हस्तक्षेप रोक्नुमात्र अब पर्याप्त नहुने भन्दै क्रिकेटमा लगानी बढाउने वातावरण सिर्जना गर्न आवश्यक रहेको बताए।
उपप्रधान एवं रक्षामन्त्री खड्काले खेल क्षेत्रलाई थप मर्यादित, सुरक्षित, एवं व्यवसायिक तुल्याउन सरकारी तथा निजी क्षेत्रबाट उदारतापूर्वक अघि बढ्नु आजको आवश्यकता भएको बताए।
उनले नेपाली टिमको औसत आयु हेर्दा विश्वका जवान टिममध्ये एक भएको भन्दै थुप्रै क्रिकेटप्रेमी युवाहरू सुनौलो अवसरको आशामा क्रिकेटमार्फत् आफ्नो खेल सक्षमता र कुशलता प्रदर्शन गर्न आतुर रहेको बताए।
उनले क्रिकेटको विस्तार र सबलीकरण गर्न उच्चतम प्राथमिकताका साथ काम अघि बढाउने प्रतिवद्धता जनाए।
कार्यवाहक प्रधानमन्त्री खड्काले नेपाल सरकार र संवद्ध सबै संघसंस्था र खेलाडीहरू स्वयंले पनि नेपालको महिला क्रिकेट टिमलाई सशक्त र मजबुत तुल्याउन दीर्घकालीन योजना बनाइ उच्च तदारूकताका साथ काम गर्नुपर्ने आवश्यकता रहेको बताए।
उनले कीर्तिपुर खेल मैदानमा भौतिक विकास गर्नका लागि २८ करोडको बहुवर्षीय ठेक्का अगाडि बढेको बताए।
