नेकपा एमालेको बागमती अधिवेशनको निर्वाचन कार्यतालिका सार्वजनिक भएको छ।
पार्टी कार्यालय च्यासलमा भोलि बिहान ८ बजे मतदाता नामावली प्रकाशन हुनेछ। यसैगरी अन्तिम नामावली ९ बजे प्रकाशन हुने एमालेले जनाएको छ।
९-११ उम्मेदवारी दर्ताका लागि समय तोकिएको छ। ४ बजे उम्मेदवारी नामावली प्रकाशन हुने र ५ बजे अन्तिम नामावली प्रकाशन हुनेछ।
मतदान भने बिहीबार बिहान हुने एमालेले जनाएको छ।
यसैगरी, नेकपा (एमाले) बागमतीले मंसिरमा चुनाव भएकाले पार्टीले अपेक्षित परिणाम ल्याउन नसकेको निष्कर्ष निकालेको छ।
बागमती प्रदेशको जारी अधिवेशनको बन्दसत्रमा प्रस्तुत राजनीतिक प्रतिवेदनमा मंसिर महिना निर्वाचनका लागि प्रतिकूल मौसम भएको निष्कर्ष निकालिएको छ।
‘हाम्रा मतदाता किसान, मजदुर र न्यून आय भएका व्यक्तिहरू निर्णायक हुन्। मंसिर महिना अत्यधिक काममा व्यस्त रहनु, उनीहरूसँगको भेटघाट र अन्तरक्रियाका लागि समय पर्याप्त भएन। उनीहरू पनि परिचालित हुन सकेन,’ राजनीतिक तथा सांगठनिक प्रतिवेदनमा उल्लेख छ। त्यस्ता मतदातालाई मतदानकै दिन मतदान स्थलसम्म पुर्याउन नसक्दा भोट कम आएको विश्लेषण गरिएको छ।
‘यो यस निर्वाचनका लागि मात्र होइन आगामी निर्वाचनका लागि पनि ध्यान दिनुपर्ने विषय हो,’ एमाले बागमती प्रदेशको राजनीतिक प्रतिवेदनमा उल्लेख छ।
त्यस्तै एमाले बागमतीले उम्मेदवारहरूका बीचमा एकले अर्कालाई हराउन शंकाले पनि सहकार्यको भावना नभएको र त्यसको सोझो असर परिणाममा परेको प्रतिवेदनमा उल्लेख छ।
-1695626526.jpg)
