नेकपा (एमाले) को बागमती प्रदेश अधिवेशनमा सर्वसम्मतिबाट नेतृत्व चयन गर्ने प्रयास जारी छ।
बुधबार बिहानैदेखि अधिवेशनको अध्यक्ष मण्डलले सर्वसम्मतिको प्रयास गरिरहेको छ।
सर्वसम्मतिको प्रयास भइरहेका मतदाता नामावली प्रकाशन र उम्मेदवारको मनोनयन दर्ताको समय लम्बिएको छ।
अध्यक्ष मण्डलका सदस्य शेरबहादुर तामाङले आफूहरूले सर्वसम्मतिका लागि प्रयास गरिरहेको बताए।
‘हामी प्रयास गरिरहेका छौं, सर्वसम्मति भएन भने साथीहरू स्वस्थ प्रतिस्पर्धा गर्नुहुन्छ,’ तामाङले भने,‘एमालेमा प्यानल बनाउन निषेध छ।’
आज बिहान अध्यक्ष मण्डलले अध्यक्षका आकांक्षी कैलाश ढुंगेल, कृष्ण दाहाललगायतसँग सर्वसम्मतिबारे छलफल गरेको थियो।
‘उहाँहरूले तपाईंहरूले एकले अर्कालाई छोडेर सर्वसम्मति गर्नुस् भन्ने कुरा गर्नुभयो,’ अध्यक्षका आकांक्षी रहेका कृष्ण दाहालले सेतोपाटीसँग भने,‘हामीले नेताले कार्यकर्ता होइन, कार्यकर्ताले नेता छान्ने प्रक्रियामा जाऔं, हामी मित्रवत् प्रतिस्पर्धा गर्छौं भन्यौं।’
उम्मेदवारी दर्तापछि पनि सर्वसम्मति गर्न सकिने भएकाले निर्वाचन कार्यतालिका अघि बढाउन आफूहरूले आग्रह गरेको उनले बताए।
आज बिहान ९ देखि ११ बजेसम्म उम्मेदवारले मनोनयन दर्ता गर्ने कार्यतालिका भए पनि अहिलेसम्म प्रक्रिया सुरू भएको छैन।
यसअघि मतदाताको नामावली सार्वजनिक गरिएको थियो। प्रदेश अधिवेशनमा ११६४ प्रतिनिधि छन्।
सर्वसम्मति नभए बिहीबार बिहानदेखि नेतृत्वको चयनका लागि मतदान हुने कार्यतालिका छ।
अध्यक्षका आकांक्षीमा रामेछापका कैलाश ढुंगेल, केशरबहादुर बुढाथोकी, मकवानपुरका कृष्ण दाहाल, काठमाडौंका सानु श्रेष्ठ र नुवाकोटका केशव पाण्डे छन्। पाण्डे निवर्तमान प्रदेश अध्यक्ष हुन्।
