कार्यवाहक प्रधानमन्त्री एवं रक्षामन्त्री पूर्णबहादुर खड्काले संघीयता कार्यान्वयनमा सरकार दृढ रहेको बताएका छन्।
उनले संघीय शिक्षा विधेयक संसदमा टेबुल भइसकेको बताउँदै निजामति कर्मचारी ऐन र संघीय प्रहरी ऐन संसदमा दर्ता गर्ने तयारी सरकार रहेको बताए।
‘संघीय लोकतान्त्रिक गणतन्त्रको कार्यान्वयन गर्न सरकार दृढ भएर लागिपरहेको छ,’ बुधबार वीरेन्द्रनगरमा आयोजित पत्रकार सम्मेलनमा उनले भने, ‘संघीय शिक्षा ऐन संसदमा टेबुल भइसकेको छ, सम्बन्धित मन्त्रालयले निजामती र प्रहरी ऐन तयारी गरेर संसदमा दर्ता गर्ने तयारी गरिरहेका छन्।’
उनले संघीय सरकारले कानुन नबनाउँदा संघीयताको अनुभूति नागरिकले प्रत्यक्ष गर्न नसेको बताउँदै वर्तमान सरकार संघीयता कार्यान्वयनमा प्रतिबद्ध रहेको बताए।
खड्काले सुशासन, विकास निर्माण र देशको समृद्धिका लागि सरकारले देखिने गरेर काम गरिरहेको बताए। उनले केही दिनभित्रै सुशासन सम्बन्धी कार्यक्रम घोषणा गर्न लागिएको बताए।
खड्काले प्रधानमन्त्री पुष्पकमल दाहाल ‘प्रचण्ड’को चीन भ्रमण सफल भएको बताए।
उनले बेल्ट एन्ड रोड इनिसिएटिभ (बीआरआई) सत्ता गठबन्धन दलको सहमतिमै प्रधानमन्त्रीले सहमति जनाएको बताए।
‘चीनसँग भएका सहमति र सम्झौताहरू देश हितमा छन्। गठबन्धनको सहमतिका यि सबै सहमति प्रधानमन्त्रीले गर्नु भएको हो,’ उनले भने।
उनले विकास–निर्माणका सन्दर्भमा देखिएका कानुनी अड्चनहरुलाई हटाउन केही नेपाल ऐन संशोधनको प्रक्रिया अघि बढेको बताए।
‘सडक लगायतका पूर्वाधार बनाउन बनको जग्गा उपभोगमा ठूलो समस्या देखिएको छ। त्यसलाई हटाउनका लागि केही नेपाल ऐन संशोधनलाई संशोधन गर्ने प्रक्रिया अघि बढाएका छौं,’ उनले भने।
खड्काले सुर्खेत विमानस्थल विस्तारमा सबैको साथ र सहयोग हुन आवश्यक रहेको बताए। प्रभावित क्षेत्रका जनतालाई साथमा लिएर विमानस्थल विस्तार गर्नुपर्ने उनले बताए।
‘अहिलेको विमानस्थल बढीमा चार सय मिटर विस्तार गर्न मिल्छ, भविष्यका लागि यो विमानस्थलले भार थेग्न सक्दैन्,’ उनले भने, ‘अहिलेलाई सुर्खेत विमानस्थल विस्तार गर्दै रामघाटमा भविष्यका लागि ठूलो विमानस्थल निर्माण गर्नु आवश्यक छ।’
आर्थिक अभावको बहानामा कृतिम अभाव देखाएर गरिने बजार मूल्यवृद्धि वृद्धि हटाउन, कालोबजारी अन्त्य गर्ने कुरामा पनि सरकार गम्भीर रहेको उनले बताए। खड्काले कर्णालीका सडक तथा राजमार्गहरुमा भएका ठेक्का प्रक्रिया तीब्र रुपमा अघि बढिरहेको बताए। सबै तहसँग समन्वय गरेर विकासका कामलाई तीब्र गतिमा अगाडि बढाइने उनले बताए।
