नेकपा (एमाले) का महासचिव शंकर पोखरेलले ०८४ को चुनावमा बहुमत ल्याउने गरी पार्टी अघि बढ्ने बताएका छन्।
बुधबार सुर्खेतमा कर्णाली प्रदेशको पहिलो अधिवेशन उद्घाटन गर्दै महासचिव पोखरेलले पार्टी एकताबद्ध रहेको बताए।
‘एमालेलाई बलियो राजनीतिक शक्तिका रूपमा स्थापित गर्न र एकल बहुमत सरकार बनाउने संकल्पसाथ हामी अघि बढेका छौं,’ उनले भने।
एमाले हरेक कुरामा एकताबद्ध रहेको र देशको नेतृत्व गर्न सक्षम रहेको उनको भनाइ थियो। यो सन्देश अधिवेशनबाट पनि दिनुपर्ने उनले बताए।
‘एमालेलाई चौतर्फी घेराबन्दी गर्ने प्रयत्न भइरहेको छ,’ उनले भने, ‘हामी एकताबद्ध भएर अघि बढ्नुपर्छ।’
एमालेको प्राथमिकता अहिले सरकारभन्दा पनि मुलुकको हित रहेको उनको भनाइ थियो।
‘०८४ मा जनताको समर्थनमा बहुमत ल्याएर बलियो राष्ट्रिय शक्तिका रुपमा स्थापना गर्ने मिसन पूरा गर्नुछ। यसका लागि एकताको खाँचो छ। त्यो एकताको सन्देश कर्णालीको अधिवेशनबाट हुनेछ,’ उनले भने।
