नेपालमा लगानी वातावरण र सम्भावनाबारे बहराइनमा छलफल भएको छ।
नेपाली कांग्रेसनिकट जनसम्पर्क समितिले सोमबार गरेको अन्तर्क्रियामा नेपालको अहिलेको अवस्था, सरकार तथा दलहरूको भूमिका, देशको समृद्धिका लागि गैरआवासीय नेपालीहरूले खेल्न सक्ने भूमिका र नेपालमा लगानी वातावरण र सम्भावनाबारे छलफल भएको छ।
जनसम्पर्क समिति बहराइनको ११ औं वार्षिकउत्सवका अवसरमा भएको कार्यक्रमको उद्घाटन कांग्रेसका महामन्त्री विश्वप्रकाश शर्माले गरेका हुन्। छलफलमा करिब ४० देशमा रहेका नेपाली प्रतिनिधिहरू सहभागी थिए।
यो छलफलमा गैरआवासीय नेपाली संघ (एनआरएनए) को अध्यक्षका दौडमा रहेका तीन जना उम्मेदवार एकै मञ्चमा देखिए। अध्यक्षमा महेश श्रेष्ठ (जापान), बद्री केसी (रसिया) र आरके शर्मा (कतार) ले आफ्ना योजना सार्वजनिक गरेका थिए। उनीहरूले नेपाली डायस्पोराको हितमा र नेपालको समृद्धिमा योगदान गर्ने प्रतिबद्धता जनाएका थिए।
जनसम्पर्क समितिले गरेको छलफलमा कांग्रेसका सहमहामन्त्री भिष्मराज आङ्दम्बे, बहराइनका लागि नेपाली राजदूत तीर्थराज वाग्ले, अमेरिकाका प्रतिनिधि बुद्धि सुवेदी, नेदरल्यान्डका नारायण आचार्य, कतारका नरेन्द्र भाट, साउदी अरबका अर्जुन थापा, पोर्चुगलका तिलक गैह्रे, युएईका भवानी तिम्सिना लगायतले धारणा राखेका थिए।
