प्रमुख प्रतिपक्षी नेकपा एमालेका अध्यक्ष केपी शर्मा ओलीले पूर्वराष्ट्रपतिहरूको अवस्थाबारे प्रधानमन्त्री पुष्पकमल दाहाललाई प्रश्न सोधेका छन्।
मंगलबारको प्रतिनिधि सभा बैठकमा बोल्दै ओलीले पूर्वराष्ट्रपतिहरूको अवस्थाबारे सोधेका हुन्।
‘अहिले पूर्वराष्ट्रपतिहरूको हालत के छ? कसरी बस्नुभएको छ। के खाएर बस्नुभएको छ। कहाँ बस्नुभएको छ? सम्माननीय प्रधानमन्त्रीज्यू, यहाँलाई थाहा छ?,’ ओलीले प्रश्न गरे, ‘उहाँले खान पाउनुभएको छ कि तातोपानी खाएर बस्ने अवस्थामा पुर्याउनुभएको छ तपाईंहरूले?’
सरकारमा बसेकाहरूले आफूलाई मात्र हेर्ने गरेको उनको भनाइ छ। सरकारले सकेसम्म संसदसमेत फेस नगर्ने गरेको ओलीले बताए। प्रधानमन्त्री दाहाल विदेश भ्रमणमा जाँदा १७ दिनसम्म संसद बन्द रहेको उनले बताए।
सभामुख विदेश भ्रमणमा जाँदा कर्मचारी र सहयोगीलाई लैजान नदिइएको पनि ओलीको भनाइ छ।