नेकपा (एमाले)का अध्यक्ष केपी शर्मा ओलीले नेपाली कांग्रेस साह्रो पुरानो र थोत्रो भएको टिप्पणी गरेका छन्।
पार्टी कार्यालय च्यासलमा बिहीबार शिवचन्द्र कुशवाहासहितलाई पार्टी प्रवेश गराउँदै कांग्रेस ३२ सिटेका पछाडि लागेको बताएका हुन्।
‘कांग्रेस साह्रो पुरानो भयो। साँच्चै थोत्रो भयो। केही पनि गर्न नसक्ने। उसँग ८७ सिट छ तर ३२ सिटेको पछाडि लुरूलुरू लागेको छ,’ उनले भने।
अध्यक्ष ओलीले उमेरमा हजुरबुवा बलियो, काम पनि गर्न सक्ने भए पनि बूढो भएपछि नातीका पछाडि लाग्नुपर्ने भएजस्तै कांग्रेसको अवस्था देखिएको बताए।
‘उहिले होला, हजुरबुवा बलियो काम पनि गर्नुहुन्थ्यो होला, बूढो भएपछि नातीका पछाडि पनि हिँड्नुपरेको छ नि, त्यस्तै भएको छ कांग्रेसलाई। निरीह भएको छ, केही पनि गर्न नसक्ने भएको छ कांग्रेस। आफूसँग कति सिट छ भनेर पनि चाल नपाउने भएको छ कांग्रेस, त्यति पनि चाल पाउँदैन,’ उनले कटाक्ष गरे।
एकीकृत समाजवादीले भन्नु ठीकै भएको उनको टिप्पणी थियो।
‘माधवकुमार नेपालले भन्नु त ठीकै हो। राति मैले पढेको थिएँ। जेसुकै गल्ती गरे पनि कांग्रेसबिनाको सरकार सोच्न सकिँदैन। कांग्रेस त हुनैपर्छ। हामी कांग्रेसका पछाडि लाग्छौं। हामी कांग्रेसकै पछि लाग्न हिँडेका हौं भनेका रहेछन्। माधवकुमार नेपाललाई त यसो भन्न सुहाउँछ। १० वटा सिट छ। ३२ सिट, ८७ सिट हुनेका पछाडि लाग्नु त स्वाभाविकै हो,’ उनले भने।
पुष्पकमल दाहाल ‘प्रचण्ड’ नेतृत्वको सरकारले नराम्रोबाहेक केही नगरेको उनले बताए।
‘माओवादीका नेता–कार्यकर्तासँग मेरो भेट हुन्छ। पीडा पोख्छन्। मजदुरले बाटो बनायो, मोटर अर्कैले मोटर कुदायो भनेजस्तो भएको छ। अहिले छोरी–ज्वाइँ, अर्का छोरी ज्वाइँ, भाइ–भतिजा सप्रिएका छन्। माओवादीका तमाम पार्टी कार्यकर्ता पीडित छन्, तड्एिका छन्, दुःख पाएका छन्। तिनको बलिदान, तिनको त्याग सम्झिन पनि फुर्सद छैन सत्तासीनहरूलाई। यिनीहरूसँग देश बनाउने कुनै नीति छैन,’ उनले भने।
