गण्डकीका मुख्यमन्त्री सुरेन्द्रराज पाण्डेले मुस्ताङको घरपझोङ गाउँपालिकाको भवन उद्घाटन गरेका छन्।
सात करोड ५९ लाख रुपैयाँमा निर्माण भएको भवनको बिहीबार मुख्यमन्त्री पाण्डेले उद्घाटन गरेका हुन्। भवन बनेपछि जनतालाई सेवा प्रवाहमा अब थप सहज हुने बताए।
बिहीबारदेखि मुस्ताङमा सुरू भएको कृषि तथा पर्यटन महोत्सवको पनि मुख्यमन्त्री पाण्डेले शुभारम्भ गरेका छन्।
मुस्ताङ, मनाङ, उत्तरी गोरखा जस्ता गण्डकी प्रदेश भित्रका हिमाली क्षेत्रको बिकासका लागि सरकारले बजेटमा प्राथमिकता दिएको मुख्यमन्त्री पाण्डेको भनाइ थियो।
मुस्ताङको बिकासका लागि धार्मिक पर्यटनलाई प्राथमिकता दिनुपर्ने उनले बताए। मुक्तिनाथ, कागबेनीको प्रर्वद्धन र बिकास जरुरी रहेको उनको भनाइ छ।
प्रदेश सरकारले मुस्ताङ जिल्लाको लागि यस वर्ष ८० करोड विकास बजेट बिनियोजन गरेको र आगामी वर्ष यो बजेट एक अर्ब पुग्ने उनले बताएका थिए।
मुस्ताङसम्म पुग्ने सडक स्तरोन्नती गर्नुपर्ने आवश्यकता रहेको बताउँदै उनले अहिलेको भन्दा ४८ किलोमिटर छोटो दुरीको वीरेठाँटी, म्याग्दी, घोरेपानी हुँदै तातोपानी जोड्ने सडकका लागि १० करोडमा बहुवर्षीय ठेक्का लगाएर चालु वर्षदेखि नै निर्माण सुरु गरिने बताए।
