सत्तारूढ नेपाली कांग्रेसको भ्रातृ संस्था, नेपाल विद्यार्थी संघको आन्दोलनका कारण त्रिभुवन विश्वविद्यालय सेवा आयोगको काम प्रभावित भएको छ।
अध्यक्ष प्रा.डा. घनश्याम भट्टराई र सदस्य प्रा.डा. हेमराज ढकाललाई नेविसंघले कार्यालय प्रवेशमा रोक लगाउँदै तालाबन्दी गरेको छ।
आयोगले शिक्षक र कर्मचारीको छनौट प्रक्रियामा अपारदर्शीता र अनियमितता देखाएको आरोप नेविसंघको छ।
नेविसंघ त्रिवि समिति सभापति विष्णु बडैलाले जारी गरेको विज्ञप्तिमा आयोगले गर्ने कामकारबाही विश्वविद्यालयको हितमा नहुने दाबी गरिएको छ।
नेविसंघ आन्दोलनका कारण उपप्राध्यापक, सहप्राध्यापक र प्राध्यापकको अन्तर्वार्ता हुन सकेको छैन।
प्रमुख प्रतिपक्षी नेकपा एमालेका सचेतक महेश बर्तौलाले यसबारे शुक्रबार प्रतिनिधि सभामा धारणासमेत राखेका थिए।
‘नेविसंघले आयोगमा तालाबन्दी गरेकोले समाजशास्त्र र हिन्दी विषयको अन्तर्वार्ता रोकिन पुगेको छ,’ उनले भने।
नेविसंघले आयोगका काममा अवरोध पुर्याएको उनले बताए।
सेवा आयोगले व्यवस्थापन, समाजशास्त्र, हिन्दी र मैथिली विषयका प्राध्यापक र सहप्राध्यापक पदको अन्तर्वार्ता असोज १४ देखि १९ गतेसम्मका लागि तय गरेको थियो।
असोज १४ देखि असोज १८ गतेसम्म बिनाअवरोध अन्तर्वार्ता भएका थिए।
हिन्दी विषयको प्राध्यापक तथा सहप्राध्यापक र समाजशास्त्र प्राध्यापक तथा सहप्राध्यापकको अन्तर्वार्तामा शुक्रबार अवरोध खडा भएपछि अन्तर्वार्ता गर्न नसकिएको सेवा आयोगका केदारनाथ ढकालले जारी गरेको विज्ञप्तिमा उल्लेख छ।
परिस्थिति सहज भएपछि अन्तर्वार्ता गरिने उनले बताएका छन्।