नेकपा (एमाले) का महासचिव शंकर पोखरेलले पार्टी सबैतिर छ तर सबैतिर देखिन नसकेको टिप्पणी गरेका छन्।
उपत्यका विशेष प्रदेश कमिटीको पहिलो अधिवेशन उद्घाटनमा बोल्दै उनले पार्टीका नेता–कार्यकर्ताको क्रियाशीलता घटेको बताएका हुन्।
‘हाम्रो आन्दोलनको मुख्य समस्या भनेका हामी सबैतिर छौं तर सबैतिर देखिन सकेनौं। किनभने हाम्रो सक्रियता घटेको छ। हाम्रो क्रियाशीलता घटेको छ। हाम्रो समर्पण घटेको छ। यो अधिवेशनका माध्यमबाट हाम्रो सक्रियता, क्रियाशीलता र समर्पणलाई पुनर्जागृत गर्नुपर्ने छ। अधिवेशन पुराना कामहरूको समीक्षा, नयाँ योजना, नीतिको निर्माण भएकाले यसमा पुनर्विचार गर्नुपर्छ,’ उनले भने।
पार्टीमाथि चौतर्फी हमला र आक्रमण भएका बेला नेतृत्व निर्माणमा सहमतिकै विधि अवलम्बन गरिएको उनले बताए।
‘त्यसबेला पार्टीलाई विभाजित गर्ने काम भएको थियो। तपाईंले आफ्ना कार्यक्षेत्रभित्र नेतृत्व निर्माणका लागि सहमतिमै जोड दिनुभयो। अहिले हामी संगठनात्मक चुनौती एक ढंगबाट सामना गर्न सफल भएका छौं। अहिले आन्तरिक लोकतन्त्रलाई अवलम्बन गर्ने कुरा गरिरहँदा पार्टीलाई समूहगत हिसाबले विभाजित गर्ने षड्यन्त्रकारूपमा दुरूपयोग गर्ने खालका प्रयत्नहरू भइरहेका छन्,’ उनले भने।
कार्यकर्ताहरू नेतृत्वका लागि प्रतिस्पर्धा गर्ने, सामाजिक सञ्जालहरूमा, आमसञ्चारहरूमा नेताहरूलाई जोडेर विभाजनको आधार तयार गर्ने खेलहरू भइरहेको उनको बुझाइ छ।
‘लोकतन्त्र उन्नत एकता निर्माणको आधार हो। लोकतन्त्रलाई शक्तिलाई क्षय गर्ने कुरा होइन। हामी लोकतान्त्रिक अभ्यास गर्छौं भने पार्टीलाई अझ एकताबद्ध बनाउँछौं भन्ने कुरालाई गहिरोसँग आत्मसात गर्नुपर्छ। उन्नत लोकतान्त्रिका प्रक्रिया अवलम्बन गर्दा लोकतान्त्रिक संस्कृतिअनुरूप हुनुपर्छ। एक पटकको प्रतिस्पर्धा सधैंको प्रतिस्पर्धा, सधैंका प्रतिस्पर्धी बन्न पुग्छौं। हामीले त्यो कमजोरी सुधार गर्नुपर्छ। आकांक्षीहरू आउँदा हरेक प्रतिनिधिले हुन्छ,हुन्छ भनिदिने, चुनाव जित्छु भनेर हरेकले लड्नैपर्ने देखिन्छ,’ उनले भने।
यसलाई निरूत्साहित गर्न प्रतिनिधिले ‘यतिबेला फलानो कमरेडलाई अघि सार्दा उपयुक्त हुन्छ’ भनेर भन्नुपर्ने बताए।
‘एकता निर्माणमा यो प्रवृत्ति बाधक छन्। जुन प्रकारले विभाजनको प्रयास भइरहेको छ। तपाईंहरूको उदासिनताले पनि काम गरेको छ,’ उनले भने।
अधिवेशन भोलिसम्म चल्ने छ। अधिवेशनले नयाँ नेतृत्व चयन गर्ने छ।
