विवेकशील साझा पार्टीका पदाधिकारीले राष्ट्रपति रामचन्द्र पौडेललाई पार्टीको 'संघीय लोकतान्त्रिक गणतन्त्र संवर्द्धन अभियान'बारे जानकारी गराएको छ।
पार्टी अध्यक्ष समिक्षा बाँस्कोटा, उपाध्यक्ष प्रकाशचन्द्र परियार, विमला अधिकारी घिमिरे, केन्द्रीय सदस्य डा.सुशील साह सम्मिलित प्रतिनिधि मण्डलले आज बिहान राष्ट्रपति पौडेललाई भेटेर गणतन्त्र बिरोधीहरूको अनावश्यक प्रहार र दुष्प्रचारप्रति सचेत रहन विशेष ध्यानाकर्षण गराएको हो।
विवेकशील साझाले संघीय लोकतान्त्रिक गणतन्त्रको स्थायित्व र संवर्द्धनका लागि यसका आधार स्तम्भहरु राष्ट्रपति, अदालत तथा संवैधानिक निकायहरुको गरिमा बचाईराख्न पनि राष्ट्रपति पौडेलको ध्यानाकर्षण गराएको छ।
ती संस्थाहरुलाई दलीय दुष्प्रभावबाट मुक्त गर्नुपर्ने विषय पनि राष्ट्रपति समक्ष राखिएको विवेकशील साझाका प्रवक्ता आशुतोष प्रधानले जानकारी दिए।
प्रतिनिधि मण्डलले संविधानको रक्षार्थ यसको प्रभावकारी कार्यान्वयनमा जोड दिँदै सबै दलहरुलाई राष्ट्रिय सहमतिमा ल्याउने पहलकदमीका लागि भूमिका निर्वाह गर्न राष्ट्रपतिलाई पौडेललाई अनुरोध समेत गरिएको पनि उनले बताए।
सो अवसरमा राष्ट्रपति पौडेलले सात दशक लामो संघर्षबाट प्राप्त नेपालको संविधानको रक्षा र संवर्द्धन गरेर मुलुकको संमृद्धिमा सम्पूर्ण ध्यान केन्द्रित गर्नुपर्ने धारणा राखे।
उनले श्रम र जनशक्तिको विदेश पलायनले गाऊँ रित्तिरहेकेमा चिन्ता प्रकट गर्दे देशमै राम्रो शिक्षा र रोजगारीको सृजना गरेर गाउँमै बसौं-बसौ बनाउनु आजको आवश्यकता रहेको पनि बताए।
