प्रधानमन्त्री पुष्पकमल दाहाल 'प्रचण्ड'ले राज्यमाथि जनताको नियन्त्रण, निगरानी र हस्तक्षेप जति प्रभावशाली हुन्छ, लोकतान्त्रिक प्रणाली त्यति नै बलियो हुने बताएका छन्।
नुवाकोटको बेलकोटगढी नगरपालिकाका पूर्व उपमेयर कविता ढुंगानाद्वारा लिखित पुस्तक स्थानीय सरकार:अपेक्षा र अवस्था पुस्तकको लोकार्पण गर्दै प्रधानमन्त्रीले लोकतान्त्रिक गणतन्त्रलाई सुदृढ बनाउन सबैले गम्भीर रूपमा चिन्तन गर्नुपर्ने बताए।
‘संघीय लोकतान्त्रिक गणतन्त्रलाई सुदृढ गर्ने जिम्मेवारी राष्ट्रिय कार्यभार हो। यतिबेला हामी संघीय लोकतान्त्रिक गणतन्त्र संस्थागत गर्ने कानुनहरू निर्माण गर्ने चरणमा छौं। यस सन्दर्भमा हामी सबैले गम्भीर रूपमा चिन्तन गर्न जरूरी छ,’ उनले भने।
प्रधानमन्त्री प्रचण्डले लोकतान्त्रिक गणतन्त्रविरूद्ध विभिन्न प्रयत्न भएकाले यस्तो बेला स्थानीय सरकारलाई थप जनमुखी बनाएर व्यवहारबाट प्रतिक्रान्तिकारी सोच पराजित गर्न जरूरी रहेको बताए।
‘राज्यमाथि जनताको नियन्त्रण, निगरानी र हस्तक्षेप जति प्रभावकारी हुन्छ, राज्यलाई त्यति नै लोकतान्त्रिक बनाउँछ,’ उनले भने, ‘ऐन बन्न नदिने वा कुनै तरिकाले रोक्ने र गणतन्त्रले खराब भन्दै हिँड्ने प्रवृत्ति हामीकहाँ छ।’
यस्ता प्रवृत्ति हलो अड्काउने र गोरू चुट्नेजस्ता हुने प्रधानमन्त्रीको भनाइ थियो।
प्रधानमन्त्रीले संघीय लोकतान्त्रिक गणतन्त्रले परिकल्पना गरेका ऐन, कानून लागू राम्रोसँग नगरिदिने र यो व्यवस्था नै ठीक छैन भनेर फेरि पुरानै सामन्ती निरंकुशतातिर फर्काउन चाहने कसरत विभिन्न कोणबाट देखा परेको बताए।
‘यस्तो बेलामा स्थानीय सरकारको महत्व के हो ? त्यसको आवश्यकता किन हो? भन्ने बारे स्थानीय जनप्रतिनिधि जसले आफैंले अनुभव गरे उनीहरुले जनतालाई अझै प्रशिक्षित गर्नुपर्ने आवश्यकता पहिले भन्दा बढेको छ,’ प्रधानमन्त्री प्रचण्डले भने।
