नेकपा (एमाले) ले इजरायलमा हमासद्वारा मारिएका १० नेपाली विद्यार्थीको शव ल्याउन सरकारले तुरून्त पहल गर्नुपर्ने बताएको छ।
एमाले अध्यक्ष केपी शर्मा ओलीले सोमबार विज्ञप्ति जारी गर्दै सरकारको ध्यानाकर्षण गराएका हुन्।
‘घटनामा परी घाइते हुनेहरूको तत्काल उपचार, अप्ठ्यारोमा परेकाहरूलाई उद्धार तथा ज्यान गुमाउनेहरूको शव स्वदेश ल्याइ परिवारलाई बुझाउने सुनिश्चितताका लागि म नेपाल सरकारसमक्ष जोडदार माग गर्दछु,’ अध्यक्ष ओलीले हस्ताक्षर गरेको विज्ञप्तिमा भनिएको छ।
‘लर्न एण्ड अर्न’ योजनाअन्तर्गत इजरायलको कृषि फर्ममा काम गर्न र सीप सिक्न गएका नेपाली मारिएको भन्दै एमालेले दुःख व्यक्त गरेको छ।
‘दसैंको मुखमा भएको यस पीडादायक घटनाबाट शोकमा पर्नुभएका परिवारजनमा गहिरो समवेदनाका व्यक्त गर्दछौं। हामी सबै शोकमा छौं। म सबैमा धैर्यधारण गर्न आग्रह गर्दछौं,’ अध्यक्ष ओलीले विज्ञप्तिमार्फत् भनेका छन्।
इजरायलमा प्यालेस्टिनी विद्रोही समूह हमासले शनिबार गरेको आक्रमणप्रति एमालले निन्दा र भर्त्सना गरेको छ।
‘निर्दोष नागरिक, वृद्धवृद्धा र बालबालिकाको हत्या र अपहरण जस्ता अमानवीय कार्यले प्यालेस्टिनी जनताले उठाउँदै आएको समस्या समाधान गर्दैन बरू थप बढाउन मद्दत गर्छ भन्ने हाम्रो पार्टीको ठम्याइ छ,’ एमालेले भनेको छ।
