नेकपा (एमाले) मधेस प्रदेशको अधिवेशन आज (बुधबार) देखि जनकपुरमा सुरू हुँदै छ। आज मध्याह्न अधिवेशनको उद्घाटन हुने र बिहीबार बन्दसत्र हुने प्रदेश उपसचिव आरती भण्डारीले जानकारी दिइन्।
पार्टी अध्यक्ष ओलीले आजै मधेस प्रदेशको पार्टी कार्यालय ‘मिथिला भवन’ को शिलान्यास गर्ने एमालेले बताएको छ।
मधेस प्रदेशमा एमालेका ६६ हजार २०० पार्टी सदस्य रहेको भट्टराईले बताए। १ सय ३६ स्थानीय तहबाट १ हजार २१ जना प्रतिनिधि चुनिएर आएका छन्।
अधिवेशनले २ सय ३५ सदस्यीय प्रदेश कमिटी निर्वाचित गर्ने छ।
मधेस प्रदेशको आगामी नेतृत्वका लागि अहिलेसम्म तीन जनाले आकांक्षा राखेको एक प्रतिनिधिले बताए। उनका अनुसार धनुषाका लक्ष्मीनारायण यादव आफ्नो पक्षमा समर्थन जुटाउन कस्सिएका छन्। धनुषाका पार्टी सचिव रहिसकेका उनी अहिले प्रदेश सदस्य छन्।
त्यस्तै सर्लाहीका राजनारायण साह र चन्देश्वर मण्डलले पनि अध्यक्षमा आकांक्षा राखेको ती प्रतिनिधिले बताए।
‘पार्टी अध्यक्ष केपी शर्मा ओली र महाचिव शंकर पोखरेलले लाइन दिइसकेको अवस्था छैन। मैदानमा उम्मेदवारहरूले आ–आफ्नो ढंगले तयारी गरिरहेको देखिन्छ,’ प्रदेश कमिटीका एक सदस्यले भने, ‘अध्यक्ष र महासचिवको संकेत नपाइसकेकाले उनीहरू खुलेर प्रचारमा चाहिँ लागेका छैनन्।’
प्रदेश अध्यक्ष रामअवतार यादव सिराहा, सुखीपुर नगरपालिकाको प्रमुख भएकाले उनी दोहोरिन पाउँदैनन्। एमालेले यसअघि नै सांसद, जनप्रतिनिधिलाई उम्मेदवार बन्न नपाउने सर्कुलर मातहत कमिटीमा पठाइसकेको छ।
प्रदेश अध्यक्षको आकांक्षीको रूपमा अहिलेका उपाध्यक्ष रेवती पन्त पनि थिए। झलनाथ खनाल प्रतिष्ठानका पूर्वअध्यक्ष रहेका उनीविरूद्ध सर्प पालनका नाममा भ्रष्टाचार गरेको भन्दै मुद्दा दायर भएपछि उनी प्रतिस्पर्धाबाट बाहिरिएका छन्।
बाराका पुरूषोत्तम पौडेल, सप्तरीका सुमनराज प्याकुरेलले पनि चाहना राखेका थिए। तर, उनीहरू प्रतिनिधि आएनन्।
‘पोलिटब्युरो र केन्द्रीय सदस्यहरू प्रतिनिधि नआएपछि तलै प्रतिस्पर्धा हुन लागेको हो,’ अर्का एक प्रतिनिधिले भने।
