नेकपा (एमाले) सुदूरपश्चिम प्रदेश अधिवेशनमा सहमतिबाटै नेतृत्व छान्न खोज्दा निर्वाचन प्रक्रिया लम्बिएको छ। निर्वाचन कमिटीले बिहीबार बिहान ८ बजेबाट मतदान गर्ने गरी नयाँ तालिका निकाल्न खोजे पनि अध्यक्ष मण्डल सहमतिकै लागि प्रयासरत रहेको नेताहरूले बताएका छन्।
‘अधिकांश पदमा सर्वसम्मत भइसकेको छ। सहमतिमै नेतृत्व छान्छौं। प्रक्रियागतरूपमा केही बाँकी छन्। केही क्लस्टर मिलाउन बाँकी रहेको छ,’ स्थायी कमिटी सदस्य कर्ण थापाले भने।
अध्यक्षमा अछामका कृष्णप्रसाद जैसी र भरतबहादुर साउदको उम्मेदवारी बाँकी रहेको छ। अछामका कमल तिमिल्सिना र कञ्चनपुरका बचनबहादुर सिंहले बुधबार उम्मेदवारी फिर्ता लिइसकेका छन्। सहमतिका लागि बाधक नबन्ने भन्दै दुवै प्रत्याशीले उम्मेदवारी फिर्ता लिएका हुन्।
उपाध्यक्षमा बाजुराका कालीबहादुर शाही निर्विरोध भइसकेका छन्। उपाध्यक्षमा उम्मेदवारी दिएका हरिसिंह साउद, हजारी साउद, बलदेव रेग्मी, रणबहादुर महराले उम्मेदवारी फिर्ता लिएपछि उनी निर्विरोध भएका हुन्।
सचिवमा रणबहादुर चन्द पक्ष र रतन राज रेग्मीको उम्मेदवारी बाँकी रहेको छ। सचिवमा उम्मेदवारी दिएका राजेशकुमार खातीले उम्मेदवारी फिर्ता लिएका छन्।
महिला उपसचिवमा भागिरथी विष्ट र तिमिल्सेना कन्दकला राना र कलशा महरा छन्। त्यस्तै खुला उपसचिवमा नरबहादुर बिक र अशोककुमार चन्दको उम्मेदवारी बाँकी छ।
महिला उपसचिवमा उम्मेदवारी दिएकी अर्चना गहतराजले उम्मेदवारी फिर्ता लिएकी छिन्।
खुलातर्फ रामदत्त जोशी, हरिदत्त जोशी पल्लवराज भट्ट र सुरेन्द्रबहादुर पालले पनि उम्मेदवारी फिर्ता लिएका छन्।
प्रदेश सदस्य भूगोलमा डडेल्धुरा, दार्चुला, डोटी र बाजुरा जिल्ला सर्वसम्मत भएको, बैतडी र बझाङमा युवा, महिला आदि क्लस्टरमा निर्विरोध भएको मुख्य निर्वाचन अधिकृत पदम पालले जानकारी दिए।
अध्यक्षमा उम्मेदवारी दिएका कृष्णप्रसाद जैसी कर्ण थापा पक्षका हुन् भने भरत साउद भीम रावल पक्षका हुन्। रावल पक्षले अध्यक्षमा साउद, सचिवमा रतनराज रेग्मी र उपसचिवमा र नरबहादुर बिकलाई अघि सारेका हुन्।
सहमतिमै नेतृत्व टुंग्याउने हो भने बिकलाई उपसचिव बनाइनुपर्ने रावल पक्षको माग छ। अन्यथा चुनावमै जानुपर्ने उनीहरूको जोड रहेको छ।
‘कमिटीलाई समावेशी बनाउन पनि हामी बिकलाई अघि सारेका हौं। उहाँलाई उपसचिव बनाउने हो भने भरत साउद उम्मेदवारी फिर्ता लिन तयार हुनुहुन्छ,’ रावल निकट एक नेताले भने।
सहमति खोज्ने भन्दै बन्दसत्र चार दिन लम्ब्याएपछि ६५७ मध्ये अधिकांश प्रतिनिधि लाखापाखा लागिसकेका छन्। पहाडी जिल्लाका कम्तीमा ४० प्रतिशत प्रतिनिधि घर फर्किइसकेको एक नेताले बताए।
अधिवेशनले १ सय ५५ सदस्यीय प्रदेश कमिटी निर्वाचित गर्ने छ।
