नेपाली कांग्रेसले कोशी प्रदेशमा विकसित भएको राजनीतिक घटनाक्रमलाई अप्रत्याशित र आकस्मिक भनेको छ।
प्रचार विभाग प्रमुख मीनबहादुर विश्वकर्माले अप्रत्याशित र आकस्मिक घटना भएको बताए।
कोशीमा सत्ता गठबन्धनले नेकपा माओवादी केन्द्रका इन्द्र आङ्बोलाई मुख्यमन्त्री बनाउने बिहीबार बालुवाटारमा छलफल गरेर सहमति गरेको थियो।
तर नेता शेखर कोइरालानिकट कोशीका सांसदले मुख्यमन्त्री माओवादीलाई छाड्न चाहेनन्। कोइरालानिकट कोशी कांग्रेस सांसद केदार कार्कीले एमालेका ३९ र कांग्रेसका ८ गरी कूल ४७ जना सांसद (बहुमत) को हस्ताक्षर पेश गर्दै प्रदेश प्रमुखकहाँ मुख्यमन्त्रीमा दाबी पेश गरेका छन्।
कोशीमा कांग्रेसका २९ जना सांसद छन्।
कांग्रेस, माओवादी, एकीकृत समाजवादी र जसपा संसदीय दल नेताको हस्ताक्षरसहित माओवादीका आङ्बोले पनि मुख्यमन्त्रीमा दाबी गरेका छन्।
कोशी प्रदेश प्रमुख परशुराम खापुङ्गले संविधानको धारा १६८ को उपधारा ५ अनुसार असोज २६ गते अपराह्न ५ बजेभित्र मुख्यमन्त्रीमा दाबी पेश गर्न समय दिएका थिए।
गत असोज २० गते हिक्मत कार्कीले मुख्यमन्त्री पदबाट राजीनामा दिएका थिए।
कांग्रेससहित केन्द्रमा सरकार बनाएको सत्ता गठबन्धनका दलका शीर्ष नेताहरूले कोशीमा माओवादीको मुख्यमन्त्री बनाउन सहमति गरे पनि कांग्रेस कोशीका केही सांसदहरूले यो निर्णय अस्वीकार गरेका हुन्।
कोशीमा विकसित राजनीतिक घटनाक्रम अप्रत्याशित भएको कांग्रेस प्रचार विभाग प्रमुख विश्वकर्माले बताए। ‘पार्टीका सबै नेताहरूसँग छलफल गरेर नै निर्णयमा पुगिएको थियो तर आकस्मिक र अप्रत्याशित घटना भएको छ। यसबारे पार्टीले बैठक नै गरेर धारणा बनाउनुपर्छ,’ उनले भने।
