परराष्ट्र मन्त्री एनपि साउदले इजरायलमा रहेको नेपालीहरूको सुरक्षा र सहयोगका लागि त्यहाँको सरकार प्रतिबद्ध देखिएको बताएका छन्।
इजरायलबाट फर्किएर शुक्रबार बिहान त्रिभुवन अन्तर्राष्ट्रिय विमानस्थलमा पत्रकाहरूसँगको कुराकानीमा उनले नेपालीसँगै अन्य मुलुकका नागरिकहरुको सुरक्षाका लागि इजरायल सरकार प्रतिबद्ध रहेको आफूले पाएको बताएका हुन्।
तेल अभिभमा इजरायलका विदेशमन्त्री आफूलाई भेट्न आएको भएपनि जहाज डिले हुँदा भेट हुन नसकेको उनले बताए।
तेल अभिभमा इजरायली विदेश मन्त्रालयका अधिकारीहरूसँग कुराकानी भएको र त्यहाँको सरकार सजग, सतर्क र समर्पित पाएको मन्त्री साउदले बताए।
उनले इजरालयबाट थप नेपाली उद्धार गर्न चाँडै अन्य जहाज पठाइने बताएका र नियमित जहाजबाट पनि नेपालीलाई फिर्ता ल्याइने बताए।
युद्धमा परी घाइते नेपालीहरूको उपचार भइरहेको र बेपत्ता भएका विपिन जोशीको खोजी भइरहेको इजरायली विदेश मन्त्रालयका अधिकारीहरूले जानकारी दिएको मन्त्री साउदले बताए।
‘हराएका नेपालीको खोजीका लागि इजरायल सरकारलाई आग्रह गरेको छु,’ मन्त्री साउदले भने, ‘उनको बारेमा सूचना संकलनको काम भइरहेको त्यहाँका विदेश मन्त्रालयका अधिकारीहरूले बताएका थिए।’
मृतकहरुको शव नेपाल ल्याउने विषयमा पनि पहल भइरहको मन्त्री साउदले बताए।
इजरायली विदेशमन्त्रालयका अधिकारीहरूसँगको कुराकानीमा शव रूजु गर्न जटिल रहेकाले समय लागेको जानकारी पाएको मन्त्री साउदले बताए।
‘त्यो पूरा हुनेबित्तिकै नेपाललाई हस्तान्तरण गर्ने भनिएको छ। हामीले यथाशिघ्र गर्न भनेका छौं। यसमा उहाँहरू पनि तयार सहमत हुनुहुन्छ,’ मन्त्री साउदले भने।
