जिल्ला अदालत काठमाडौंले इलेक्ट्रिक चुरोट (भेप) भित्र ९ किलो सुन तस्करी गरी ल्याएको अभियोग लागेका राहुल महरालाई पुर्पक्षका लागि थुनामा पठाएको छ।
शुक्रबार न्यायाधीश दण्डपाणि शर्माको इजलासले महरालाई थुनामा पठाउने र अर्का अभियुक्त लोकेन्द्र कुमार पौडेललाई पाँच लाख धरौटी मागेर छोड्ने आदेश गरेको जिल्ला अदालत काठमाडौंका सूचना अधिकारी दिपक दाहालले जानकारी दिए।
‘उक्त मुद्दाका दुई प्रतिवादीबारे थुनछेक आदेश भयो। राहुल महरालाई पुर्पक्षका लागि थुनामा पठाउने आदेश भएको छ भने लोकेन्द्र कुमार पौडेललाई पाँच लाख धरौटी माग्ने आदेश भएको छ। उनी धरौटी बुझाएर छुटेका छन्,’ दाहालले भने।
सरकारी वकिल कार्यालय काठमाडौंले चार जनालाई प्रतिवादी बनाएर बुधबार मुद्दा दर्ता गरेको थियो।
नेकपा माओवादी केन्द्रका उपाध्यक्ष कृष्णबहादुर महराका छोरा राहुल, सर्लाही घर भई काठमाडौंको नागार्जुन नगरपालिका वडा नम्बर ४ सितापाइला बस्ने ३९ वर्षीय लोकेन्द्रकुमार पौडेल, बेल्जियमका नागरिक ३९ वर्षीय दावा छिरिङ र काठमाडौं महानगरपालिका वडा नम्बर ६ बौद्धका ५७ वर्षीय निमा गुरूङविरूद्ध मुद्दा दायर भएको थियो। निमा भने फरार छन्। अदालतले उनीविरूद्ध पक्राउ वारेण्ट जारी गरेको जिल्ला अदालत काठमाडौंका सूचना अधिकारी दाहालले बताए।
लोकेन्द्रकुमार सुन तस्करी प्रकरणमा प्रमुख व्यक्ति दाओजिन वाङका सवारी चालक हुन्। दावा ब्रेक शुमार्फत ६० किलो ७१६ ग्राम सुन तस्करी गरेको प्रकरणमा पक्राउ परी पुर्पक्षका लागि थुनामा छन्।
उनीहरूविरूद्ध तीन वटा कसुरमा मुद्दा दायर भएको हो।
आपराधिक विश्वासघात, भन्सार चोरी पैठारी तथा संगठित अपराध सम्बन्धी कसुरमा मुद्दा दायर भएको हो।
गत पुस १० गते फ्लाइ दुबईबाट आएका चिनियाँ नागरिक ली हानसङले ल्याएको ७३ वटा बट्टामा रहेको ७३० वटा भेपभित्र ९ किलो सुन थियो।
८ करोड ५५ लाख २८ हजार तीन सय ७४ रुपैयाँ बराबरको सुन भन्सार कार्यालयबाट चोरी भएपछि यो घटना बाहिरिएको थियो। केन्द्रीय अनुसन्धान ब्युरो (सिआइबी)ले अनुसन्धान गरी पाँच जनाविरूद्ध मुद्दा चलाएको थियो।
सुन बरामद गरेपछि राहुल महरा, कृष्णबहादुर महरा लगायतले सामान छुटाउन दबाब दिएका थिए। उनीहरूको पनि कनेक्सन देखिएपछि सिआइबीले अनुसन्धान गरेको हो।
सिआइबीले राहुल महरालाई पक्राउ गरे पनि पूर्वसभामुख कृष्णबहादुर महरासँग भने कागज मात्रै गरेको थियो।
यी पनि: महरा र उनका छोरासँग सम्पर्क भएका शंकास्पद चिनियाँले एयरपोर्टमा छोडेको सुन
नेपालमा सुन तस्करीको साम्राज्य खडा गरेका दाओजिन वाङ!
सुन तस्करीका नाइके दाओजिनले भनेपछि भेप छुटाउन भन्सार कार्यालय पुगेका थिए राहुल महरा
