राष्ट्रिय स्वतन्त्र पार्टी (रास्वपा)का सभापति रवि लामिछानेले भ्रष्टाचारको आरोपमा जेल बसिसक्दा, राष्ट्रको ढुकुटी रित्याउँदा पनि मत दिइरहने जनता कस्ता भन्दै नेकपा (एमाले)का अध्यक्ष केपी शर्मा ओलीलाई जवाफ फर्काएका छन्।
सोमबार एक कार्यक्रममा बोल्दै एमाले अध्यक्ष ओलीले नीति, सिद्धान्त नभएका दललाई मत दिने जनता कस्ता भन्दै प्रश्न गरेका थिए।
सोमबारदेखि चलेको नीति मन्थन नामक विमर्शको समापन गर्दै सभापति लामिछानेले राष्ट्रको हरेक सूचकांकलाई रातोमा पुर्याउनेलाई निर्वाचित गराउने मतदाता कस्ता भन्दै जवाफ फर्काएका हुन्।
‘नो भोटबाट न्यु भोटमा आएको पुस्तालाई बताउनै पर्ने हुन्छ। जनता पनि कस्ता, यो नयाँ दल नीति विचार केही पनि छैन, सिद्धान्त पनि केही छैन, भर्खरै आएको छ, तिनलाईचाहिँ भोट हालिहाल्ने जनता पनि कस्ता भनेर जनताको चेतनालाई पनि चुनौती दिएको यदाकदा मैले पनि सुन्ने गरेको छु,’ उनले भने, ‘हामीलाई माया गर्ने, सद्भाव राख्ने भोट हाल्ने जनता कस्ता होइन, आफ्ना नेताहरू भ्रष्टाचारको आरोपमा जेल बसिसक्दा, राष्ट्रको ढुकुटी रित्याउँदा हरेक क्षेत्रको इन्डिकेटर्सहरूलाई रातोमा पुर्याउँदामा पनि अझै पनि तपाईंकै दललाई भोट हालिरहने ती भोटर्सचाहिँ कस्ता?’
जनताले ह्वारह्वार्ती भोट नदिएको र पुराना राजनीतिक दलप्रति मतदाताको विश्वास कायमै रहेको देखिएको उनले बताए।
‘जनताको चेतनालाई चुनौती दिने हाम्रो हैसियत छैन। जनताको त्यो चेतनालाई चुनौती नदिन पनि आग्रह गर्छु,’ उनले भने।
रास्वपाले सोमबार र मंगलबार राजनीतिक दस्तावेज निर्माणका लागि नीति मन्थन कार्यक्रम आयोजना गरेको थियो। यसअघि रास्वपाले केन्द्रीय नेता र सांसदहरूलाई दस्तावेज निर्माणकै लागि १९ जिल्ला खटाएको थियो।
अब विश्वविद्यालयहरूमा नीति मन्थन गरिने पनि सभापति लामिछानेले जानकारी दिए।
