नेपाली कांग्रेस कोशी प्रदेशका सांसद उद्धव थापाले केदार कार्कीलाई मुख्यमन्त्री बनाउँदा पार्टीभित्र झगडा गरेका ८ जना सांसदहरूसँग कुरा मिलिसकेको बताएका छन्।
मुख्यमन्त्री कार्कीसहित कांग्रेसका ८ सांसद र नेकपा (एमाले) का ३९ सांसदको समर्थनमा कार्की मुख्यमन्त्री भएका थिए।
उनले कांग्रेसका ८ जनाले पार्टीभित्र झगडा गरे पनि यो विषय मिलिसकेको बताए।
बुधबार प्रदेश सभामा बोल्दै उनले भने, ‘कोशीमा को मुख्यमन्त्री बन्ने भन्दा पनि समस्याको समाधान हुनु राम्रो कुरा हो। एमालेले केदार कार्कीलाई समर्थन गर्दा कोशीमा हामी समाधान नजिक पुगेका हौं जस्तो लाग्छ।’
उनले पार्टीका ८ जना सांसदले झगडा गरेको पनि बताए। ‘८ जना सांसदले पार्टीभित्र झगडा गर्नुभयो। कुण्ठा पोख्नुभयो,’ उनले भने, ‘उहाँहरू युद्ध जितेर घरमा आएपछि हामीले गाला जोड्यौं।’
एमालेभित्र जतिसुकै झगडा भए पनि चाहिएका बेला मिल्ने गरेको उल्लेख गरेका उनले आफूहरूले पनि ८ जना सांसदहरूसँग गाला जोडिसकेको बताए।
उनले एमालेलाई अहिलेको सरकारलाई समर्थन गरिराख्न पनि आग्रह गरे। ‘मध्यावधिबाट जोगाउन एमालेले पनि यो सरकारलाई साथ दिइरहोस्,’ उनले भने, ‘बजेटलाई पनि हार र जितका कुरा नबनाऊ। अध्यादेशबाट बजेट चल्ने अवस्था सहमतिमा अन्त्य गरौं।’
