नेपाली कांग्रेसका नेता विमलेन्द्र निधिले धार्मिक पर्यटनको माध्यमबाट देशमा आर्थिक समृद्धि हासिल गर्न ऐतिहासिक धार्मिकस्थल जनकपुरधाम र भारतको अयोध्यालाई हवाई सेवामार्फत जोड्न सरकारलाई आग्रह गरेका छन्।
बिहीबार साँझ जनकपुरधाम विमानस्थलमा सञ्चारकर्मीसँग कुराकानी गर्दै नेता निधिले विभिन्न चरणमा भएको छलफलपछि हवाई सेवा सञ्चालनका लागि निजी क्षेत्र तयार रहेको भन्दै भारतीय पक्षसँग कुरा गरेर बाँकी प्रक्रिया तत्काल सुरू गर्न सरकारलाई आग्रह गरेका हुन्।
'विगत दुई-तीन वर्षदेखि जनकपुर र अयोध्यालाई हवाई सेवामार्फत जोड्न सकिने सम्भावनाबारे विभिन्न चरणमा कुराकानी भइरहेको थियो। मैले जानकारी पाएअनुसार निजी क्षेत्रको बुद्ध एयर सातामा तीन दिन हवाई उडान भर्न तयार छ,' प्रतिनिधि सभा सदस्य समेत रहेका निधिले भने, 'अब वायु सेवा निगम, संस्कृति, पर्यटन तथा नागरिक उड्डयन मन्त्रालयले पहलकदमी लिएर उडान अनुमति, पूर्वाधार निर्माण र भारत सरकारसँग आवश्यक सम्झौता गर्न जरूरी छ। यसका लागि म सम्बद्ध पक्षसँग विशेष अनुरोध गर्न चाहन्छु।'
अयोध्यामा निर्माणाधीन श्रीराम मन्दिरको सन् २०२४ जनवरीमा भारतीय प्रधानमन्त्रीले प्राण प्रतिष्ठा (समुद्घाटन) गर्ने कार्यक्रम रहेको र त्यसपछि त्यहाँ बढ्ने धार्मिक पर्यटकीय गतिविधिबाट लाभ लिन हवाई सेवा जरूरी रहेको भन्दै नेता निधिले त्यसभन्दा अघि नै नेपाल सरकारले आवश्यक पहलकदमी लिनुपर्ने आवश्यकता औंल्याए।
यस कार्यले जनकपुरमात्र नभई सिंगो नेपालले नै आर्थिक लाभ लिन सक्ने नेता निधिको भनाइ थियो।
त्यसैगरी उनले जनकपुरधाम र कैलाश मानसरोवरलाई जोड्न नयाँ सम्भावना खोजी र प्रचारप्रसार पनि जरूरी रहेको धारणा राखे। उनले नेपालकै भूमिबाट कैलाश मानसरोवर पुग्नसक्ने बाटो निर्माणका लागि पनि सरकारसँग माग गरे।
