अमेरिका र अष्ट्रेलियाका आप्रवासीहरूले एनआरएनएको वर्तमान कार्यसमितिले संसारभर छरिएर रहेका नेपाली आप्रवासीहरूको प्रतिनिधित्व नगर्ने बताएका छन्।
अमेरिकाबाट तरूण पौडेल, सुरेन्द्रराज देवकोटा, राजेन्द्र बहादुर राउत, रमेश पन्त, सुमन पराजुली, आमोद पोख्रेल, घनश्याम भट्ट र अष्ट्रेलियाबाट महेश भण्डारीले संयुक्त विज्ञप्ति जारी गरी एनआरएनए २/२ वर्षमा काठमाण्डौंमा हुने अधिवेशन/सम्मेलन/जमघट तथा त्यहाँबाट घोषणा गरिने सिण्डिकेटेड पदाधिकारी र बन्ने/बनाइने समितिले सन्सारभर छरीएका नेपाली आप्रवासीको सही प्रतिनिधित्व नगर्ने बताएका हुन्।
‘विश्वभरका देशहरुमा वर्षौंदेखि बिभिन्न इलम, अध्ययन, पेसा र ब्यवसायका शिलशिलामा रहेका लाखौं नेपालीको मातृभूमीप्रतिको माया, सद्भाव र सहयोगलाई दलीयकरण, ब्यापारीकरण र नगदीकरण गर्ने एनआरएनए भन्ने संगठन, त्यसका मतियार र स्वघोषित नेतागणप्रति घोर आपत्ती जनाउदै उक्त संस्था प्रति नेपाल सरकार एवं थरिथरी राजनितिक दल, व्यापारीहरुको स्वार्थी अभिष्टप्रति दुख प्रकट गर्दछौं,’ विज्ञप्तिमा भनिएको छ।
संसारभर रहेका नेपाली आप्रवासीमध्ये २ प्रतिशतले पनि स्वेच्छाले एनआरएनएको सदस्यता नलिएको उनीहरूको दाबी छ।
यसका सदस्य, उम्मेदवार बन्ने बनाउनेदेखि जित्ने जिताउनेसम्मका कामहरू अपारदर्शी मात्र नभइ निर्वाचन प्रक्रिया नै खरिदबिक्री र लिलामी भएको उनीहरूले बताएका छन्।
‘यस संस्थाको प्रादुर्भाव नै अपारदर्शी र कतिपयको अबैध कर्मलाई बैधता दिलाउन भएको देखिँदै आएको अहिले सरोकारवालाहरुलाई स्पष्ट हुँदैछ। त्यसकै चपेटामा गैरआवासीय नेपाली नागरिकता समेत परेको छ,’ विज्ञप्तिमा भनिएको छ।
एनआरएनएका नाममा केहीले नैतिकताविहीन र लाज लाग्ने गतिविधी गरेको र त्यसले अधिकांश आप्रवासी नेपालीको प्रतिष्ठा र साखमा धक्का पुगेको उनीहरूले बताएका छन्।
विदेशमा नेपाली मूलका आप्रवासीका नाममा दलीय झण्डा, दलीय भाषा, दलीय भक्ती र व्यक्ती विशेषहरुको साथै केही व्यापारीको सेवा गर्ने, नेपालीहरुबीच फाटो र झगडा गराउने एनआरएनए आप्रवासी नेपालीको चाहना नभएको उनीहरूले स्पष्ट पारेका छन्।
उनीहरूले देश भित्र र बाहिरका नेपाली नेपाली बिचको भ्रातृत्व र भावनामा खेलवाड गर्ने र आपसमा विभाजन गराउने किसिमका गतिविधिप्रति चनाखो रहन सबै नेपालीलाई आग्रह गरेका छन्।
एनआरएनएको अध्यक्ष निर्वाचित बद्री केसीमाथि धाँधली गरी चुनाव जितेको आरोप छ। एनआरएनएको महासचिव उम्मेदवार केशव पौडेलको पक्षमा शून्य मत देखिएपछि एनआरएनएको अधिवेशन विवादित बनेको छ।
कात्तिक २ गते सम्पन्न अधिवेशनबाट बद्री केसी १३७८ मत प्राप्त गर्दै अध्यक्ष निर्वाचित भएका थिए। अध्यक्षका प्रत्यासी आरके शर्माले १२८१ र महेश श्रेष्ठले १२२५ मत प्राप्त गरेका थिए।
महासचिवका उम्मेदवार पौडेलको शून्य मत आएपछि उनीसँगै अध्यक्षमा पराजित शर्मा र श्रेष्ठले वर्तमान कार्यसमिति अवैध रहेको बताउँदै निर्वाचन परिणाम अस्वीकार गर्ने घोषणा गरेका थिए।
उनीहरूले अध्यक्ष निर्वाचित केसीमाथि भोटिङ मेसिन कब्जा गरी नियोजित रूपमा आफूहरूलाई पराजित गरेको आरोप लगाएका थिए।
