राष्ट्रिय स्वतन्त्र पार्टीका सभापति रवि लामिछानेले २०८४ मा सबै राजनीतिक दलहरुलाई पराजित गर्ने बताएका छन्।
शनिबार ललितपुरमा आयोजित एक कार्यक्रमलाई सम्बोधन गर्दै उनले यस्तो बताएका हुन्।
उनले नयाँ दलका रूपमा २१ जना सांसद सदनमा आएको तर कुनै पनि राजनीतिक दलहरूले जनताका लागि काम नगरेको बताए। दिनदहाडै हत्या गर्नेहरूलाई संविधान दिवसका दिनमा मुक्ति दिएर नयाँ दल र जनतालाई के गर्न सक्छौं गर भन्ने चुनौती दिएको उनले बताए।
उनले आउने चुनावमा कुनै पनि दललाई एक सिट पनि जित्न नदिने बताए।
'हाम्रो आँखैअगाडि नयाँ दलका रूपमा २१ जना सांसद सदनमा आएका छन्। स्थानीय तहमा एकसेएक होनहार मानिस आएका छन्। तैपनि दिनदहाडै मान्छे काट्नेलाई संविधान दिवसका दिनमा मुक्ति दिएर 'ल के गर्न सक्छौ, आएर?' भनेर हामीलाई ठाडै चुनौती दिए। यस्त कयौं बेथितिका चुनौती दिएका छन्,' उनले भने।
लामिछानेले थप भने, 'भ्रष्टाचारका फाइल खोल्ने भने तर तर्सिएर बन्द गरेका छन्। तपाईंहरूको आवाज त्यति सुनिएन भनेर कहिलेकाहीँ केही मानिसले हामीलाई भन्नुहुन्छ। चर्को बोल्नुपर्छ भन्नुहुन्छ। केमा दिने, कति दह्रो बोल्ने, के भन्ने? अब ठूलो स्वर गर्ने, दबाब दिने होइन, २०८४ मा एकैपटक बाइबाइ गर्ने, एउटा सिट पनि नदिने। ख्याल गर्नुहोला। एक-दुई सिट दिनुपर्छ, पुराना पार्टी हुन् भन्ने लाग्छ भने के तपाईं थप वाइडबडीमा भ्रष्टाचार भएको हेर्न चाहनुहुन्छ? नेपालीलाई नक्कली भुटानी शरणार्थी बनाएर बेचेको अझै हेर्न चाहनुहुन्छ? नेपालीहरूको सुनौलो भविष्य भन्थे, त्यो सुनौलो भविष्य भनेको त आफ्ना छोराहरूलाई सुन ल्याउनका लागि सुनौलो भनेका रहेछन्।'
सभापति लामिछानेले नेपालीहरूको सुनौलो भविष्य भन्ने दल र नेताहरुले आफ्ना मानिसका लागि सुनैसुनको महल खडा गरेको बताए।
