गृह मन्त्रालयका विभिन्न निकायका कामकारबाहीमा सुधार ल्याउन पूर्वमुख्यसचिव लिलामणि पौड्यालको संयोजकत्वमा अध्ययन समिति गठन भएको छ।
उपप्रधान एवं गृहमन्त्री नारायणकाजी श्रेष्ठले मन्त्रालयका काम प्रभावकारी बनाउन समिति गठन गरिएको सोमबार सिंहदरबारमा आयोजित कार्यक्रममा जानकारी गराए।
उनकाअनुसार मन्त्रालयले गत कात्तिक २४ गतेदेखि नै समिति बनाएर काम गरेको छ। गृहले विशेष गरी ७ वटा निकायको काम सुधार गर्ने गरी योजना बनाएको छ।
नेपाल प्रहरी, सशस्त्र प्रहरी, कारागार व्यवस्थापन, अध्यागमन विभाग, स्थानीय प्रशासन तथा त्यसका सेवा प्रभाव, विपद् व्यवस्थापन र राष्ट्रिय परिचय पत्रलाई कसरी प्रभावकारी बनाउने भन्ने विषयमा अध्ययन गर्न समिति बनाइएको गृहमन्त्री श्रेष्ठले बताए।
‘यी अध्ययन समितिले कानुनी वा नीतिगत सुधार गर्नुपर्ने भए सुझाव दिन्छ,’ मन्त्री श्रेष्ठले भने, ‘यी सबै क्षेत्रको सुधार गर्न अध्ययन समिति गठन भएको हो।’
समितिको तीन महिना कार्यअवधि राखिएको छ।
अध्ययन समिति संयोजक पौड्याल, सदस्यहरू पूर्वसचिव शरदचन्द्र पौड्याल, पूर्वसचिव शंकरप्रसाद कोइराला, पूर्वसचिव लक्ष्मीप्रसाद ढकाल, प्राध्यापक खड्ग केसी, पूर्वप्रहरी महानिरीक्षक प्रकाश अर्याल, पूर्वसशस्त्र प्रहरी महानिरीक्षक सिंहबहादुर श्रेष्ठ, समाजशास्त्री विन्दु पोखरेल र सूचना प्रविधि विज्ञ विजय गौतम छन्।
गृहमन्त्री श्रेष्ठले यो काम स्वयमसेवाको रूपमा हुने पनि बताए। ‘सबैले स्वयंसेवकको रूपमा काम गर्ने भनेर जिम्मेवारी लिनुभएको छ। उहाँहरूकै सुझावअनुसार यो काम थालिएको हो,’ उनले भने।
