एमालेका सात सय बढी स्वयंसेवक भूकम्प प्रभावित क्षेत्रमा खटिएका छन्।
मंसिर १ गतेबाट नेकपा (एमाले) सम्बद्ध मजदुर संगठन, नेपाल ट्रेड युनियन महासंघ जिफन्टको एक सय जनाको टोली खटिएका थिए।
प्रदेश र जनसंगठन गरी अहिले सात सय हाराहारी स्वयंसेवक पुगेको र उनीहरूले भूकम्पबाट भत्किएका संरचना सफा गर्ने काम गरिरहेको केन्द्रीय सदस्य नीरज आचार्यले जानकारी दिए।
‘मंसिर १ गतेदेखिम जिफन्टको सय जनाको टोली खटिएको थियो। उनीहरूले भेरी नगरपालिका—१ को माथिल्लो थाप्लेबाट भग्नावशेष सफा गर्ने काम गरेको थिए,’ उनले सेतोपाटीसँग भने, ‘मजदुर संगठनको समूहले सोमबारसम्म २६ भग्नावशेष पन्छाएका छन्। उनीहरूले विशेष गरेर पुराना दरबार र व्यक्तिका भत्किएका घर पन्छाएका छन्।’
उनका अनुसार सुदूरपश्चिम प्रदेश कमिटीबाट आएका २५ जनाको समूह रूकुमको सानो भेरीमा खटिएको छ। उनीहरूले मंगलबारबाट त्यहाँ अस्थायी आवाज बनाउन थाल्ने छन्।
गण्डकी प्रदेशमा आएका २५ जनाको समूह रूकुम पश्चिमको चौरजहारी नगरपालिका खटिएको उनले जानकारी दिए। उनीहरूले पनि मंगलबारबाट अस्थायी आवास बनाउन सुरू गर्ने छन्।
कर्णाली प्रदेशअन्तर्गत सुर्खेतबाट सय जनाको समूह जाजरकोट पुगेको छ। उनीहरूले तीन वटा समूह बनाएका छन्। एउटा समूह भेरी नगरपालिका-२ को तिपेमा खटिएका उनीहरूले पनि भग्नावेशष पन्छाइरहेको आचार्यले बताए। २५ जनाको एउटा समूह भेरी नगरपालिकाकै रिम्ना र अर्को नलगाड नगरपालिका-१, चिउरीमा खटिएको छ।
एमालेकै विद्यार्थी संगठन अनेरास्ववियुले उपाध्यक्ष नारायण घर्ती र महासचिव नरेश रोकायाको नेतृत्वमा एउटा समूह जाजरकोट खटाएको छ। उनीहरूले भेरी नगरपालिका-३ को पिपलडाँडामा भग्नावेशष सफा गर्ने र अस्थायी आवास बनाउने काममा खटिएका छन्।
एमालेकै खेलकुद महासंघको टोली पनि जाजरकोटको रिम्ना पुगेको छ।
नेकपा (एमाले) को सचिवालयको २५ औं बैठकले भूकम्प प्रभावित क्षेत्रमा एक हजार स्वयंसेवक परिचालन गर्ने निर्णय गरेको थियो।
एमालेका स्वयंसेवक १५ दिन प्रभावित क्षेत्रमा खटिनेछन्। उनीहरूले एक करोड रूपैयाँ बराबरको श्रमदान गर्ने एमालेको लक्ष्य छ।
एमालेका सबै जनसंगठनले स्वयंसेवक परिचालन गर्ने र युवा संघको समूह मंसिर ७ को काठमाडौंको प्रदर्शनपछि जाजरकोट खटिने छ।
मंगलबारसम्म लुम्बिनीबाट २००, कोशीबाट २५, मधेसबाट, २५ र बागमती प्रदेशबाट ५० जनाको समूह प्रभावित क्षेत्रमा आइपुग्ने आचार्यले जानकारी दिए। प्रभावित जिल्ला (जाजरकोट र रूकुम पश्चिम) मा ४० वटा टोली बनाएर स्वयंसेवक परिचालन गरिने उनले बताए।
अहिले खटिएका स्वयंसेवकहरू भाँडावर्तन, टेन्ट, ग्यास चुह्लोसहित प्रभावित क्षेत्र पुगेका छन्। पार्टीले उनीहरूलाई सुरक्षित तरिकाले भग्नावशेष पन्छाउन र अस्थायी आवास बनाउन निर्देशन दिएको आचार्यको भनाइ छ।
