नेपाली कांग्रेसले भूकम्प प्रभावित क्षेत्रमा सहयोगका लागि पार्टीका कार्यकर्ताहरू, भ्रातृ तथा शुभेच्छुक संघसंस्थालाई खटाएको छ।
महामन्त्री गगन थापाको अध्यक्षतामा केन्द्रीय कार्यालय सानेपामा मंगलबार बसेको बैठकले जाजरकोट र रूकुम पश्चिमका भूकम्पपीडितको सहयोगका लागि श्रमदान गर्न कार्यकर्ता परिचालन गर्ने निर्णय गरेको छ।
कांग्रेसले पहिलो चरणमा एक हजार अस्थायी टहरा बनाउने निर्णय गरेको छ।
‘भूकम्प प्रभावित क्षेत्रका अति जोखिममा रहेका पीडित परिवारलाई यथाशीघ्र अस्थायी घर टहरा निर्माण गरी सहयोग पुर्याउने उद्देश्यले श्रमदान गर्न एक निर्माण विज्ञ, दुई जना दक्ष मिस्त्री र सात जना स्वयंसेवक रहने गरी १०/१० जनाको समूह बनाई पहिलो चरणमा १३ समूह सम्बन्धित क्षेत्रमा पठाउने निर्णय भएको छ,’ प्रचार विभाग प्रमुख मीनबहादुर विश्वकर्माले भने, ‘उक्त समूहहरुले एक साता काम गरिसकेपछि क्रमिक रुपमा अर्को १३ वटा समूह सम्बन्धित क्षेत्रमा पठाएर पहिलो समूहलाई प्रतिस्थापन गरिनेछ।’
श्रमदानमा खटिएका जनशक्तिका साथमा सामान्य स्वास्थ्य र मानसिक स्वास्थ्यसम्बन्धी शिविर संचालन गर्न प्रजातन्त्रवादी चिकित्सक संघका चिकित्सकहरु परिचालन गर्ने निर्णय पनि कांग्रेसको छ।
साथै प्रभावित क्षेत्रमा पठन–पाठन सुचारु गर्न आवश्यक भौतिक तथा अन्य बन्दोबस्त मिलाउन नेपाल शिक्षक संघले सामूहिक रुपमा कार्य गर्ने, नेपाल विद्यार्थी संघ केन्द्रीय समितिले आफ्नै खर्चमा हाल चार वटा अस्थायी विद्यालय र छिटै दुई वटा स्थायी पक्की विद्यालय भवन बनाउने निर्णय भएको उनले बताए।
नेपाल ट्रेड युनियन कांग्रेस केन्द्रीय कार्यसमितिले भूकम्प प्रभावित क्षेत्रका अति विपन्न तथा जिविकोपार्जनका माध्यम गुमाएका असहाय परिवार तथा श्रमिकको पुर्नस्थापनासम्बन्धी अध्ययन गरी आवश्यक साधन स्रोत उपलव्ध गराई सहयोग गर्ने निर्णय पनि कांग्रेसको छ।
भूकम्प प्रभावित क्षेत्रका अस्थायी घर टहरा निर्माणमा श्रमदान गर्न जाने व्यक्ति र समूहले गर्ने काम कर्तव्य र कार्यक्षेत्रबारे बैठकमा आएका सुझावका आधारमा तयार गरिएको कार्यविधि पारित गरिएको विश्वकर्माले जानकारी दिए।
