नेकपा (एकीकृत समाजवादी)का महासचिव घनश्याम भुसालले नेताहरुलाई गाली गर्ने काम बन्द गर्न आग्रह गरेका छन्।
शनिवार काठमाडौंमा आयोजित विचार गोष्ठीमा बोल्दै उनले मुलुकको राजनीति नेताहरुले बिगारेको भएपनि नयाँ पुस्ताले उनीहरुलाई गाली गरेर आफ्नो औचित्य पुष्टि गर्न नसक्ने बताएका हुन्।
‘इतिहासमा यी नेताहरुलाई गाली गरेर कुने जेनेरेसनले आफ्नो पिढीको औचित्य पुष्टि गर्न सक्दैन। अब नेतालाई गाली गर्ने समय पनि सकियो होला। यो गाली मात्रै गर्दाखेरी त हाम्रो जिन्दगी गाली गरेर मात्रै जाने भयो। त्यसो हुनाले यो च्याप्टर क्लोज गरिदिऊँ,’ उनले भने।
उनले देश र राजनीति बिग्रनुमा नेताहरूको भूमिका रहेको भने स्वीकार गरे।
‘राजनीति हामीले नै बिगार्यौं। माथि गएकाले बिगार्यौं। यो क्रान्तिको झण्डा पपुलिष्टहरुलाई लगेर बुझाएको हामीहरु ले नै हो, हाम्रा नेताहरुले नै हो,’ उनले भने।
महासचिव भुसालले मार्क्सवादको झण्डा नेताहरुले पपुलिष्टहरुलाई लगेर बुझाएकाले समाजवाद निर्माणका लागि फेरि मार्क्सवाद पद्धतिमै फर्कनुको विकल्प नभएको बताए।-न्युज एजेन्सी नेपालबाट