नेपाली कांग्रेसका सांसद रमेश लेखकले संसद बैठकमा हुने गरेका गतिविधिले बैठक प्रत्यक्ष हेर्न आउने व्यक्तिहरूको मनोविज्ञानमा पर्ने प्रभावबारे चिन्ता व्यक्त गरेका छन्।
शुक्रबार सत्तापक्ष र प्रतिपक्ष सांसद आरोप-प्रत्यारोपमा उत्रिएपछि स्थगित भएर पुनः सुरू भएको संसद बैठकमा बोल्दै कांग्रेसका प्रमुख सचेतकसमेत रहेका लेखकले संसदमा हुने यस्ता गतिविधिले संसद बैठक हेर्न आउने बालबालिकाहरूमा संसदप्रतिको दृष्टिकोण नकारात्मक बन्ने बताएका हुन्।
‘हामीहरू देश र जनताका बारेमा कति स्वस्थ छलफल गरिराखेका छौं कति राम्रा कानुन बनाउँदै छौं। देश र जनतालाई के दिँदैछौं र कसरी दिँदैछौं र हाम्रा अभ्यासहरू कस्तो हुँदैछ भनेर उत्सुकतापूर्वक उहाँहरू हेर्न आउनुभएको हो,’ उनले भने, ‘हाम्रो तीन चार घन्टाको गतिविधिपछि ती आएका भाइबहिनीमध्ये भोलिका दिनमा सांसद भएर कसैलाई आउन मन थियो भने अरू सबै ठाउँमा जाँदा यो ठाउँमा आउनुहुँदो रहेनछ भनेर उहाँहरू फर्केर जानुहोला भन्ने बडो डर लागेको छ।’
हामीले आउने पुस्तालाई के सिकाउँदैछौं र हाम्रो गतिविधिबाट उनीहरूले के सिक्दैछन् भन्ने कुरामा गम्भीर हुनुपर्ने लेखकले बताए।
लेखकले राजनीतिक दलहरूप्रति कुनै विषयलाई लिएर असहति भएको अवस्थामा आफ्नो कुरा राख्दा संयमित भएर राख्नुपर्ने र विपक्षीको कुरा धैर्यताका साथ सुन्न सक्नुपर्ने बताए।