नेपाली कांग्रेसले चितवनको छात्रावासमा बालिका मृत फेला परेको घटनाको गहन र निष्पक्ष अनुसन्धान गर्न माग गरेको छ।
शनिबार विज्ञप्ति जारी गरेर बालिकाको मृत्युसँग जोडिएको शंकास्पद विवरणप्रति कांग्रेसको गम्भीर ध्यानाकर्षण भएको उल्लेख गर्दै निष्पक्ष ढंगले गहन अनुसन्धान गरी छिटोभन्दा छिटो सत्य बाहिर ल्याउन सरकारसँग आग्रह गरेको हो।
‘विद्यालयको अभिभावकत्वमा उज्यालो भविष्यका लागि अध्ययन गरिरहेकी एउटी बालिकाको आकस्मिक बिदाई आफैंमा अत्यन्तै दुःखद त भएको छ। झुन्डिएको अवस्थामा मृत भेटिनु र त्यसपछिल्तिर आत्महत्या दुरुत्साहन या हत्याको आशंकाको स्थिति अत्यन्तै गम्भीर छ,’ विज्ञप्तिमा भनिएको छ, ‘नेपाली कांग्रेस यो घटनालाई निष्पक्ष ढंगले गहन अनुसन्धान गरी छिटो भन्दा छिटो सत्य, तथ्य बाहिर ल्याउन र दोषीलाई हदैसम्मको कार्वाहीका लागि सरकारसँग जोडदार माग गर्दछ।'
कांग्रेसले बालिका शालिन पोखरेलप्रति श्रद्धाञ्जली अर्पण गर्दै नेपाली कांग्रेस उनको परिवारजनप्रति गहिरो समवेदना व्यक्त गरेको छ।
गत शनिबार बिहान रत्ननगर नगरपालिका-१५ माधवपुर घर भई वडा १० एकता शिशु निकेतन बोर्डिङ स्कुलको होस्टलमा बस्ने १४ वर्षीया सालिन पोख्रेल होस्टलको कोठामा रहेको सिलिङको पंखामा डोरीमा झुण्डिएको अवस्थामा मृत फेला परेकी थिइन्।
घटनापछि प्रहरीले वडा नम्बर १० कै ६० वर्षीय बालहरि देवकोटा, ४० वर्षका किरणबहादुर अधिकारी र ४८ वर्षीय कमल शर्मा पौडेललाई मंगलबार पक्राउ गरेको थियो।
बालहरि उक्त स्कुलका प्रधानाध्यापक, किरणबहादुर सहप्रधानाध्यापक र कमल होस्टेलका वार्डेन हुन्।
सालिनका आफन्तले किटानी जाहेरी दिएपछि पक्राउ परेका तीनै जनाविरूद्ध ज्यानसम्बन्धी कसुरमा अनुसन्धान गर्न प्रहरीले सात दिनको म्याद थप भएको छ।
